​Dutch Grand Prix-ah F1 a kir dawn

15th May 2019, 04:05PM

Kum 1985 hnuah Dutch Grand Prix chuan Formula One a thleng leh dawn ta.

Kum 2020 atangin Netherlands-a F1 a kir leh dawn a, nakkum May thla ni 8 atanga ni 10 chhung hian Zandvoort circuit-ah F1 an tlan leh dawn niin a lang.

Tun hnaiah Red Bull driver Max Verstappen a lar chak hle a, ani hi Belgium-a piang ni mahse a pa hi Dutch a ni a, amah pawh hian Dutch lam a awn mah zawk a, Dutch racing licence pawh a nei zawk a ni.

F1 hotute lam chuan Verstappen-a lar chho lutuk hi hi Netherlands-a F1 ngha leh an rilruk chhan pakhat niin a langa, F1 race reng rengah tun hnai chho hian Dutch an tam thin hle a, serthlum rawng kawr an ha fur thin.

Formula 1 chairman leh chief executive Chase Carey chuan, “Netherlands-ah Zandvoort track-ah Formula 1 a kir dawn tih hi lawm takin ka puanga, track thara F1 nghah hi kan lo rilruk reng tawh a ni,” a ti.

Red Bull team boss Christain Horner chuan Dutch Grand Prix chu an driver Verstappen-a vang ringawt pawha a hlawhtlin a rin thu a sawi ve mek bawk. Horner chuan, “Max-a lar em avangin Dutch Grand Prix hian boruak a nei sangin a hlawhtling hle ang,” a ti.

Dutch Grand Prix hi tihhlawhtlin a nih a, race dang paih a nih loh chuan a vawi khat nan F1-ah race 23 lai a awm dawn tihna a ni.

Copyright © inkhel.com 2024. All rights reserved.