Dutch footballer lar Dirk Kuyt chuan football a chawlhsan leh ta a, Chawlhni khan Liverpool leh Feyenoord forward hlui hi footballer rualin an thlah.
Feyenoord ho khelmual, Rotterdam khuaa De Kuip stadium-ah Dirk Kuyt thlahna inkhel an buatsaih a, ‘Dirk Kuyt Testimonial’ friendly match ah hian a club khelh tawhna - FC Utrecht, Feyenoord, Liverpool leh Fenerbahce vela a teammate te an fuankhawm a, Netherlands national team vela a khelhpui thinte pawh an tel bawk a ni.
Dutch player lar thin an tel hnem hle a, Rafael van der Vaart, Roy Makaay, Ron Vlaar, Pierre van Hooijdonk, Giovanni van Bronckhorst, Memphis Depay, Wesley Sneijder, Ryan Babel, Robin van Persie, Ruud van Nistelrooy, Nigel de Jong, John Heitinga, Edwin van der Sar, Philip Cocu. Holland national team manager ni mek Ronald Koeman leh Ruud Gullit te an tel.
2006 leh 2012 inkara a khelhna Liverpool player hlui zingah captain thin, Scottish club Rangers manager thar Steven Gerrard, Jamie Carragher, Jerzy Dudek, Luis Garcia, Fabio Aurelio, Yossi Benayoun leh Andy Carroll te an tel a.
Dirk Kuyt hi a fate pali - Noelle, Aidan, Jorden leh Roan te chuan an tawiawm a ni.
Team pathumte chu an inkhel kual a, Team Feyenoord, Team Friends of Dirk leh Team Orange te an ni a. An inkhelhna De Kuip stadium-ah hian Kuyt chuan Eredivisie title a lak chhun chu 2016-17 season khan a lo la a. Liverpool chu 2012 khan League Cup title a lakpui a, 2010 a FIFA World Cup-a Holland pahnihna an nih theihnaa player pawimawh berte zinga mi niin, 2014 a pathumna an nih pawhin a thawh hlawk hle.
An inkhelh zawh hnu hian Kuyt chuan Instagram lamah thlalak chi hrang hrang a post nghal a. “Inmangthana hun hnuhnung ber. A chang chuan mumang hi a tak ramah a chang thin” tih te a ziak a. “Ni ropui tak a va ni em! Player, coach leh fans tam takin min thlahna hun an rawn hmang thei kha a lawmawm ka ti em em a, in zavaia chungah lawmthu ka sawi mawlh mawlh e,” a ti a ni.
A chanchin tlangpui:
Kuyt 1998 khan Utrecht zawmin bul a tan a, he club-ah hian kum nga a khel a, a season hnuhnung berah hian KNVB Cup title a lakpui a, Dutch Golden Show Winner a ni bawk a.
2005 khan Feyenoord chuan Utrecht atang hian €1 million in an lei a, captain a ni nghal a, Rotterdam club-ah hian goal a khung thei hle a. Season thum chhung chu a zawnin an club tan goal thun hnem ber a ni a, 2004-05 season khan Eredivisie top scorer a ni a, 2005-06 khan Dutch Footballer of the Year atan an thlang bawk a ni.
1999 atanga 2006 chhung khan Kuyt hian game 5 chauh khelh loh a nei a, 2001-06 inkarah game 179 ngawt a khel a, Feyenoord ah hian Salomon Kalou nen inkawpin an hlauhawm thei hle a. Feyenoord tan hian league game 101 khelin goal 71 a thun.
Kum thum hnuah Feyenoord chhuahsanin Premier League club Liverpool chu £10 million in a zawm a, 2006 chawhnu lamah Premier League-ah a khel ve tan a, UEFA Champions League final a khelh hmasak berah AC Milan lakah goal a thun a ni.
Kuyt hian Liverpool tan goal pawimawh a thun hnem hman hle a. 2012 League Cup final-ah Liverpool leh Cardiff City te chu Wembley-ah an inkhel a, substitute bench atangin Kuyt hi a rawn lut a, an chakna goal a rawn thun a, Liverpool chu trophy a lakpui a. Hei chiah hi Liverpool-ah chuan trophy a la.
2004 khan ram tan a khel tan a, Netherlands tan tournament lian tham pangaah a khel hman a. 2006 FIFA World Cup, 2010 FIFA World Cup leh 2014 FIFA World Cup ah te khelin 2008 UEFA European Championships leh 2012 UEFA European Championships ah te a khel bawk a. October 3, 2014 khan ram tana inkhelh a chawlhsan thu a puang a. Ram tan hian vawi 105 khelin goal 24 a thun.
May 17, 2017 khan Kuyt hian season tawpna game an khelhah hattrick a siam a, inkhelh zawh hian football a chawlhsan thu a puang zui a. Feyenoord chu 1999 hnua a vawi khatna atan title a lakpui nghe nghe a. April 6, 2018 ah football boot a rawn bun tha leh a, Quick Boys a pui leh a. He club-ah hian assistant manager a ni hrim hrim a, tun season atan striker an neih fumfe loh avangin a inkhelh leh phah a ni.