31 May 2020 01:33

bakteaJr.

Mizo tlangval

​Dusseldorf sawpin Bayern-in champion an hnaih zel

Bundesliga inkhelah champion lai Bayern Munich chuan Allianz Arena-ah Fortuna Dusseldorf an lo mikhuala, Bayern hian an mikhual hi 5-0 laiin an lo sawp.

Bayern tan hian Polish goal thun khawl Robert Lewandowski chuan goal hnih a khung bakah Benjamin Pavard leh Alphonso Davies te chuan goal khat ve ve an khunga, Dusseldorf player Mathias Jorgensen (Zanka tia hriat lar) chuan an lamah a ti goal palh bawk.

Khelh 29-ah Bayern hian point 67 an hlawhchhuak tawha, hmahruaitu ni zelin, pahnihnaa awm Borussia Dortmund chu point 10 in an tlansana, mahse khelh khatin Bayern hi an khel tam zawk. Dusseldorf hian khelh 29-ah point 27 hlawhchhuak tawhin, 16-naah an awm mek thung.

Darkar khat khelh tlin a nih hma in Bayern hian si nga laiin hma an hruai fela, Bayern hian goal sawm vel an khung thei mai dawna a lan laiin, goal nga aia tam an khung lo.

Dusseldorf hian an goal venhim tum viau mahse Bayern attack rang leh chak tha tak chu an dang zo lo a ni bera, minute sawm chuang hret khelh a nihin Dusseldorf centre-back Zanka chuan Pavard-a shot lo khawih perin, an goal-ah a ti lut palha, Bayern-in hma an hruai.

Darkar chanve khelh a nih hma vel hretin, Bayern hian corner hmuin, Joshua Kimmich chuan corner atang hian ball a vawrh luta, French defender chuan goal-ah a lo tauh luta, Bayern goal hnihna a khung.

Half time hma lawkin Lewandowski chuan goal a khunga, hei hi Dusseldorf laka a goal khung hmasak ber a ni. Second half tir lamah Lewandowski hian Serge Gnabry-a cross chu goal-ah lo chantirin, tun season-a a goal 43-na a khunga, goal 43 khung tur hian game 37 bak a mamawh lo.

Lewandowski-a’n Bayern goal lina a khung hnu lawk hian Davies chuan Dusseldorf box pawn deuh chiah atangin mawi takin goal-ah ball a chhuih luta, Bayern goal ngana khungin, Bayern hian 5-0 in hnehna an changa, a zawna a vawi riat nan Bundesliga title an la ngei dawnin a lang a ni.

Bayern Munich 5-0 Fortuna Dusseldorf

(Zanka 15’OG, Pavard 29’, Lewandowski 43’, 50’, Davies 52’)

Player Ratings

Bayern Munich: Neuer 7; Pavard 8, Hernandez 7, Alaba 8, Davies 9; Kimmich 9, Goretzka 8; Gnabry 9, Muller 9, Coman 6; Lewandowski 9..… Subs: Cuisance 6, Perisic 6, Odriozola 6, Zirkzee 6, Batista Meier 6.

Fortuna Dusseldorf: Kastenmeier 7; Zimmermann 6, Zanka 5, Hoffmann 6, Giesselmann 6; Bodzek 6; Skrzybski 5, Morales 6, Stoger 5, Thommy 5; Karaman 6… Subs: Suttner 6, Zimmer 6, Berisha 7, Sobottka 6, Pledl 6.