14 May 2019 02:16

inkhel

Durtlang North-in Semifinal an khel dawn

Suzuki Gixxer Pro Volleyball League semifinal hmasa zawk chu May ni 13, Thawhtanni zan Durtlang North leh Anastasia Electric Veng inkhelah Durtlang North chuan 25-22, 15-25, 25-20, 25-18 (3-1) a Anastasia Electric Veng hnehin a vawikhat nan final an lut.

May ni 14, Thawhlehni zan dar 8:00-ah semifinal hnuhnung zawk Chhinga Veng Spiker leh Hunthar ten an khel leh ang a, final khel tur a hriat tawh ang

Pro Volleyball-a an tel vawi hnihnaah a vawi khat nan Durtlang North-in final an lut a, Anasatasia nen league-a an insut tumin 3-2 in an lo chak tawh a ni. Nukumah semifinal pal tlang zo lovin Tuichangral lakah an tlawm a, kuminah hma an sawn.

Anastasia-in Pro Volleyball an khelh vawi thumna a ni a, champion hmasa ber niin 2016-ah trophy an la. Kum khat an awl hnuah nikumah kir lehin knockout round an thleng pha lo va, kuminah semifinal pal tlang zo lovin an tla.

Chawnpui Sports Centre-ah Durtlang North-in a tir atangin inrintawkna sang tak nen an khel a, tlangnel leh ngampa zawk an nihna lantirin set hmasa ber an la. Tlahniam zui thut mah se set thumna atangin Lalbiakmuana leh Rahul Kataria chuan team fuih phurin kawng dikah an kir leh.

Knockout round an khelh thlengin Anastasia-in team nghet tha an nei lo va, mar takin an khel rei thei lo. Set hnihnaah sut nghing zawh lovin an khawng tha em em a, a hnu lawkah zuihin an insiksawi nasa. Langsar takin C Laldensanga inlan mah se an player thenkhatin team an tanpui zo lo.

Inrinni khan Durtlang North-in vawi nga chak zawn lai Chhinga Veng Spikers an hneh a, darkar 48 hnuah league-a sang ber ni chungin semifinal an khel. Champion turin theihna an nei tih chiang leh zualin an lantir a, nikuma an chet sual tawhna an siam tha.

Pro Volleyball-a an tel hmasa ber 2018-ah Durtlang North-in a tir lamah vung takin hma lam an pan a, league-ah an che tha. Inthununna lama harsatna an neih hnuin an talbuai a, semifinal-ah Tuichangral hneh lovin an tla.

Kuminah hma an sawn a, vawi sarih an khelh tawhah Tuichangral tho hneh lovin league-ah tlawm mah se tum ruk chakin phu takin final an lut. Anastasia nen league-a an insut tumin 3-2 in an chak a, semifinal-ah chiang zawkin an hneh a, champion tura rin kai an ni zui hle.

Inkhel pawimawhah Rahul a che tha a, point 22 hmuin 11 hloh mah se boruak sangah a rin ngam. Veikhawr Biakmuana'n tum dang aiin tihsual nghah mah se point 14 hmuin a hlawh chhuah chanve a paih a, player dangten Durtlang North an tanpui bawk a, inpumkhat takin an khel ho.

Semifinal lut zinga hniam ber Anastasia-in player an nei chhe lo va, mahse, league vawi ruk an khelh hnu thlengin team nghet an nei thei lo. A bikin state pawn atanga an lak luh pahnihin team an tibuai a, Durtlang North hmaah an inluh chhawk a, Rajath Shrivarathri aiin an khelh hmasak lama hmun chang tlem zawk Sunil S a che tha.

Densanga'n vawi 22 vaw tlain point ruk a hloh va, a team-te chakpui lo mah se RS Traders Player of the Night lawmman a dawng. Sunil chuan point 11 hlawhin point nga a paih a, an player-te theihna atangin point 10 hmu thei tur thiau ni hlawm mah se, a khelh hmasak ber atangin mi mal ni lovin team-in tlakchham a nei tluan zak.

Set hmasa berah Durtlang North kal fal nghalin 16-10 in an sang a, Densanga leh Sunil chuan Electric Veng team nawr kalin 22-23 in an hnaih chho hman. Durtlang North insang marin Fabian Lallunghnema'n a vuak tlak hnuin Biakmuana'n a hlap tla ve leh a, he set bikah hian point ruk a thawk chhuak.

Set hnihnaah Anastasia-in boruak thar an hip a, tlakfual awm miah lovin ke an pen. Tute pawh an rin tlak a, Densanga leh Sunil bakah Lalrinzuala Hnamte leh Lalramnunfela'n lehlam vuak dangin ball an hmuh an hlah lo va, awlsam takin an tlang.

Set thumna atangin Durtlang North-in rim zawkin Rahul an hmang a, rei lo te hnuah Electric Veng team chiaiin ho takin point an hloh zauh zauh a, 9-4 in an kalsan. Boruak sangah Anastasia-in insiam that an harsat a, team pahnih inkar daidang turin Durtlang North-in set pawimawh tak an la.

A hma anga khel tha tawk lo Zomuanpuia aiah Durtlang North-in Samson VL Chhanchhuaha an dah lut a, nung leh nuam ti zawkin set linaah an inlan. Anastasia an buai a, Densanga tih lo mi dangin ball vuak thlak an harsat a, lehlamah Rahul a che tha tulh tulh a, lehlamin point 20 an hmuh hmain Biakmuana'n an chakna point a thawk chhuak.

Set hnuhnung pahnihah Rahul chuan point 15 hmuin vawi thum chiah a tisual. A pumpuiah Durtlang North tan TP-a'n point kua hmuin point li a paih a, an khelh hnuhnun ber aiin Fabian-a (hmuh 7, hloh 5) leh Zoma (hmuh 6, hloh 4) tlahniam mah se team an tanpui phak.

Anastasia lamah rei lo te a khelh chhungin Rajath chuan point khat hmuin vawi nga a tisual a, nikuma Mizo Best Player Rama'n beisei a pha lo tluan a, Rinzuala (hmuh 4, hloh 1) a pawh tum dang aiin a talbuai.

Durtlang North-in champion turin khelh khat an la bak a, thawhtanni zana inkhel Chhinga Veng Spikers leh Hunthar chak zawk nen ningani zanah final an khel dawn a ni.

Junior league-ah Anastasia-in final an lut ve thung a, semifinal hmasa zawkah set hloh lovin Hunthar an hneh a, 26-24, 25-23, 25-20 in an chak. Captain K Zodingliana hovin Electric Veng Under 18 team-in rin an kai a, league-a sang ber an ni nghe nghe a ni.

Hmeichhia Final Fixtures

May 15, Nilaini - 8:00pm

Bungkawn v Durtlang

U-18 Final Fixtures

May 15, Nilaini - 6:00pm

Anastasia Electric Veng vs Chhinga Veng Spikers/TNT

(adsbygoogle = window.adsbygoogle || []).push({});