Durant-a duh apiang kan tihsak ang: Warriors GM

12th June 2018, 11:06PM

Golden State Warriors chuan NBA Finals MVP Kevin Durant leh coach Steve Kerr te chu contract ziahpui leh an tum mek a, general manager Bob Myers chuan Durant chu a duh ang ang pek an inhuam thu a sawi.

Kevin Durant chuan contract a ziak thar leh a nih chuan kum 4 chhung vel atan a nih a rinawm a, chumi chhunga a hlawh tur pawh $160 million vel zet a nih an ring a. Bob Myers chuan hlawh chungchang hi sawi chian theih a la nih loh thu sawiin, Durant-a’n a duh ang zat an pek tur thu a sawi.

Bob Myers chuan season hnih chhung Durant an kawl ve chauh a, title pahnih a lakpui nghal avangin chelh zui reng an duh thu leh an tan a hlut em avangin an inhuam thui hle tih a sawi.

“A chang chuan innawr vak ngai lo chi hi thil a awm ve thin a. Kei phei chuan kum 10 vel kawl ka duh a. Nikumah thil ropui tak min tihsak a, kan tan a thawh hlawk em em a, hei vang tak hian keini pawh kan inhuam thui hle a ni,” tiin a sawi a.

A sawi zelnaah, “A phut ang apiang hlawh hi a phu ve chiang a, contract thar ziahpui ngei hi ka duh a. Amah ber hi hlim se ka duh a, kan bula a awm zelna tur a nih phawt chuan a lungawina hi hriat ka duh a, kan theih phawt chuan a mamawh tihsak zel hi ka duh ber a ni,” a ti bawk.

“Kevin Durant hian a duh ang thlapa contract ziah tur ruahman hi a phu chiang a, a duh ang angin a ti thei ang a, rei tak kan indawr pawh ka ring lo a. Dik tak chuan kan tum ber chu felfai taka inremna kan neih theih hi a ni,” tiin Bob Myers chuan a sawi.

Coach Steve Kerr chuan a contract neih lai a hmang zo ve tep tawh a, kum nga chhung atan contract a ziahah chuan kum khat chauh a nei tawh a, hei vang hian a contract pawh hi ziah thar a ngai tawh a. Kerr hian hun rei zawk Golden State hi enkawl a duh avangin harsa lo taka an inrem mai a rinawm hle.

Copyright © inkhel.com 2024. All rights reserved.