Gokulam Kerala FC chuan Mohun Bagan chu 2-1 in an hneh a, a vawi khatna atan Durand Cup title an la.
Kolkata khawpuia Salt Lake Stadium-ah Durand Cup 2019 final hi an khel a, Marcus Joseph chuan Gokulam Kerala tan hian goal hnih a thun a, Mohun Bagan tan Salva Chamorro chuan goal khat a thun ve bawk a ni.
Antonio Vicuna chuan semi final-a Real Kashmir an hneh tuma a khelhtir pahnih chu Mohun Bagan lamah hian a thlak danglam a. Tlar hma lamah Alexander Jesuraj Romario chu VP Suhair chuan a thlak a, goalkeeper Debjit Majumder pawh Sankar Roy chuan a thlak bawk a ni.
Inkhel an tan atangin team pahnihte chu an innawr tawn nghal zak zak a, goal thun hmasa zawk nih an tum dun hle a. Minute 22-ah Mohun Bagan chuan hun tha an nei a, Joseba Beitia chuan Gokulam Kerala goal lamah chuan ball a pet a, mahse crossbar chungah a thlawk chho daih a ni.
Minute 26-ah Mohammed Rashid chuan hnai zet atanga goal thun theihna hun tha a nei a, a thun thelh thung a. Half time thlen hma deuhin Marcus Joseph chuan Kisseka chu through ball a pe a, Bagan goalkeeper Debjit nen chuan an inhmachhawn a. Debjit chuan Kisseka chu a titlu a, Gokulam Kerala chuan penalty an hlawh phah a.
Penalty chu Marcus Joseph chuan petin Durand Cup-a goal 10 a thunna hmangin Gokulam Kerala chu 1-0 hma a hruaipui a. Hemi hnuah hian half time a ni zui a, mikhual team chuan chawlhlawkah hma an hruai thei a ni.
Second half an khel chho leh a, Mohun Bagan chuan beisei an pha lo hle a. An inkhelh dan a nung lo hle a, an chauh hmel viau bawk a. Gokulam Kerala chuan hei hi remchangah an la a, minute 51-ah chuan goal an thun belh nghal a.
Ashutosh Mehta chuan ball a hloh a, Naocha Singh chuan ball chu a laksak a, veilam sirah ball chu a tlan pheipui a. Naocha Singh hian ball chu Marcus Joseph chu a pe a, Trinidadian striker hian Lalchhawnkima chu tlansanin box chhungah ball chu a luhpui a, goal-ah chuan a thun zui a ni.
Minute 64-ah Mariners chuan goal an thun ve hram a, Joseba Heitia chuan free-kick a pet a, heta ball kal zel hi Salva Chamorro chuan a lo thun a, Mohun Bagan si phurh pakhat chu a sut ve hram a ni.
Hun tawp thlengin goal dang a luh belh tawh lo a, Gokulam Kerala chu 2-1 in an chak a. Asia khawmualpuia football tournament upa ber, Durand Cup vawi 129-naah Kozhikode lam club chu a vawi khatna atan an champion ve ta a ni.