Burnley-in Chelsea atanga an hawh mek English midfielder Danyy Drinkwater chu Sunday liamta khan nightclub-ah sawisak a ni a, a hliam na viau niin a lang.

Manchester khuaa Chinawhite club-ah Drinkwater hian zu a in a, a mah pawh hi a rui hle niin chanchinbu mite chuan an tarlanga, he nightclub atang hian thehchhuah niin, pawnah  mi eng emaw zatin an sawisak rawn zui.

Drinkwater hi na taka sawisak a ni a, a hmai a duk nasa in a vunga, pem pawh awm nualin, a ngal rek a ti na bawk niin sawi a ni a, a hmuna awmte sawi danin, Drinkwater sawisatu te hian a ke ti tliah an tum niin an sawi.

Drinkwater hi kar eng emaw zat chhung a chawlh a ngai dawn niin sawi a ni a, a mah hian police lam hnenah thu eng mah a la thlen lo bawk. Burnley manager Sean Dyche chuan Drinkwater hi vawiin (Thawhtanni) hian a hmalam hun a sawipui dawn tih tarlan a ni a, Drinkwater-a hmalam hun hi a chiang lo hle.

Drinkwater-a chungchang hian Chelsea beng pawh a thleng tawha, Chelsea hian ngaihven reng mahse Burnley hmalakna an ngaichang phawt tih Sky Sports chuan a tarlang bawk.

Drinkwater hi a ruih avangin a lo buai tawh thina, thla li kalta khan zu rui tak chunga motor a khalh avangin buaina a lo tawk tawh. Tun tumah pawh hian sawisak rawn ni mahse club lam atangin hrem a tawk zui lovang tih a sawi theih lova, Burnley hian engtin tak nge hma an lak dawn a la hriat loh a ni.