Dr. T. Ao Memorial football, Nagaland a champion Mizoram team chuan January ni 30, Ningani zan khan Aizawl an rawn thleng. January ni 30, Ningani tlai khan Mizoram Football Association chuan Kolasib DFA leh Vairengte Zone FA te nena intiamrualin hmarchhak football champion team hi an lo hmuak a ni.

Vairengte a Education Department Rest House kawtah Mizoram football team lo lawmna hun tawi hman a ni a, MFA Assistant Secretary Pu Lalrawngbawla chuan inkhawm tawi kaihruaiin MFA Joint Secretary Pu C. Vanlalmawia chuan thu tawi a sawi a. MFA in hmarchhak pum huapa a vawithum nana champion team te a chhuanzia a sawi.

Mizoram team Coach Pu Lalremtluanga chuan team member te inhmelhriattirna hun hmangin, Manager Pu T. Vanlalhluna chuan Nagaland a an team chet dan report a pe a. Match hmasa berah siruk faia Meghalaya an hneh thu sawiin, a dawtah Assam chu sili faia an hneh leh thute, semi final lut tawh sa a an hmachhawn Sikkim chu an group match hnuhnung bera an hneh loh zui dan te a sawi bawk. Semi final-ah hian a thlengtu Nagaland an hmachhawn dawna mipui tamzia, Kohima khawpuia mipui an inhnawh nasat luat avanga traffic jam a Mizoram team pawh hun rei tak an tan khawtlai thu te a sawi a ni.

Manager chuan Final boruak rip lutuka a thlengtu Nagaland hmachhawn lova semi final a an nghawngkawl an khengthla thei te chu thawven thlak huaia a hriat thu Manager chuan a sawi a ni.

Mizoram hian group match-a an hneh loh Sikkim chu Final ah tum tha lehin, David Lalrinmuana goal khat hmangin an hneh ta a ni.

Mizoram hian lawmman pawisa fai cheng nuai 10 an hlawh a, Lalchungnunga Chhangte chu player of the tournament atan thlan a ni.