George Dowell-a thil chak ber chu professional football khelh a ni. Mahse, a hmalam hun thlira beiseina sang tak nena Worthing FC tana a khelh laiin a nun pumpui thlak danglam thawk tur accident a tawk ta hlauh mai le.

He vanduaina avang hian Dowell chu a awm a chin hnuai lam zawng a zeng phah a; midangte angin khelmualah ball a pet ve thei ta lo.

Worthing FC hi Dowell hian kum 2008 khan kum 16 mi niin a zawm a. An youth team tana vawi engemawzat a inlan hnuah April 2010 khan he accident vanduaithlak tak hi a tawk ta a ni. Intensive Trauma Unit, Chichester Hospital panpui anih hnuah thla sawm chhung Salisbury Spinal Unit-ah enkawl a ni zui a ni. He accident avang hian a hnungzang ruh a tliak a, a awm achin hnuailam zawng a zeng ta a ni.

A taksa lamin football khelh remti tawhlo mahse Dowell-a rilruah erawh football a hmangaihna chu a reh thei chuanglo. He defender kum 22 mi hian an club sum lama tlachhe mek tun din leh nan Worthing FC chu a accident atanga zangnadawmna (compensation) a dawn chuan a lei ta rup mai le.

"Khelmuala tlan a ball pet aia nuam chu a awm thei dawnlo. Mahse, a nuam leh tha ber ka tlin tak siloah chuan a nuam ber dawttu chu coach emaw club neitu nih hi a ni," tiin Dowell chuan BBC South Today hnenah a sawi.

A dam that leh hnu hian club thar, Worthing Borough a din zet , a club hlui sum lama an tlakchhiat thu chanchinbu lama a hmuh chuan a rilru thlakin Worthing FC hi a lei ta a ni.

Dowell-a inpekna leh thawhrimna zarah Worthing FC chuan 3g pitch thar leh stadium siamthat hna an thawk mek a ni.