Marc Marquez chuan a elpui Andrea Dovizioso chu season liam ta aiin tun season-ah a hlauhawm daih zawk niin a sawi.
Tun season MotoGP bul tannaah Andrea Dovizioso chu Qatar-ah Marc Marquez aiin a chungnung thei hram a, Argentina-ah Valentino Rossi chu pahnihna hmun inchuhnaah a pha ta lo a, pathumna a ni bawk a ni.
Ducati rider chuan a result chu tha a ti hle a, an team tan hian Termas de Rio Hondo track chu tun hma atang tawhin intlansiak harsa an tih em emna thin a ni a, hei vang hian pathumna nih pawh an team tan chuan a tha tham hle niin an sawi.
Kar hmasa khan Marquez chuan Sao Paulo-ah Dovizioso chungchang hi a sawi chhuak a, season hmasaah pawh hlauhawm tak ni tho mahse, tun season bul tan tirh atangin a hma zawng aiin a hlauhawm belh niin a sawi a ni.
Marquez chuan, “Argentina-ah khan harsa lutuk loin ka chak a, mahse tun season chhungin khatiang reng kha a ni dawn lo chiang a. Dovizioso kha ka elpui deuh ber a ni a, tun hnai kum hnih chhung phei chuan a rawn che tha em em a, tawn hriat pawh a nei tha a, season thar apiangah a hlauhawm zual zel a ni ber,” a ti.
“Yamaha leh Valentino inkawp hi an tang mar thei lo viau a, hei vang hian chuti taka hlauhawm an nih loh phah a, mahse an chet fuh tum erawh chuan an khirh thei hle tih erawh hriat reng a ngai a. Mak ve deuh chu hming lang pangngai ho hi an lang zel a ni ber a, nikumah Valentino, Dovi leh kei kha a chungnung pathum kan ni a, kuminah pawh keimahni bawk kan lang leh nghal a ni,” a ti bawk.
A sawi zelnaah, “Kum dang zawng aia Dovizioso a hlauhawm zawk ka tihna chhan pawh nasa takin hma a sawn zel a, a hmasawnna hi hmuh theihin a lang chhuak a. A hmaa a chet that lohna leh a tih fuh loh thinte kha a rawn ti dik chho hlawm a, hlauhawm tih loh theih a ni lo,” a ti.
Tun season-a an tlan tawh atangin Marc Marquez chu championship hmahruaitu a ni mek a, Andrea Dovizioso aiin point 4 in a sang zawk a. Tun kar tawpah hian tun season chhunga an intlansiak vawi thumna hmuh tur a awm dawn a, Austin, Texas a Circuit of the Americas ah an intlansiak leh ang.