Jobe Bellingham-a man chungchangah Borussia Dortmund leh Sunderland te chu €38million (£32m; $43.3m)-in an inrem ta.

German club hian kum 19 mi manah hian  €30m-€33m an pe phawt ang a, chumi hnuah add-ons an pe leh dawn a ni. Jobe hi Dortmund player lak luh man to ber a ni dawn a, kum 2016 khan Rennes atangin Ousmane Dembele kha €35m-in an lei a, Dembele record kha a rawn khum dawn ta a ni.

Dortmund head coach Niko Kovac, sporting director Sebastian Kehl leh CEO for sport Lars Ricken te chuan April thla tawp khan England an pan a, Jobe-a chhungte pawh theihtawpin an bia a, inremna an nei chho ta a ni.

Jobe Bellingham hian kum 2023 nipui lai khan Birmingham atangin Sunderland a pan a, Premier League club Crystal Palace leh Brentford te pawhin an ngaihven hle. Hetih lai hian Sunderland-ah kum 2028 thleng daih contract thar a ziak chhunzawm a, mahse Dortmund lam a hawi ta a ni.

Season liamta khan Sunderland tan Bellingham hi a khel hnem hle a, play-offs hmangin Premier League-ah an inpet kai. Jobe hian a u Jude-a hnung a zui chho ta a, season tharah chuan Germany lamah hun a hmang tawh dawn a ni.