​Dortmund-ah Hummels a kir dawn?

16th June 2019, 07:06PM

German defender Mats Hummels chuan Bayern Munich chhuahsanin a club hlui Borussia Dortmund a zawm leh dawn niin German chanchinbu mite chuan an uar hle.

Hummels hi Dortmund-a kal leh turin Dortmund nen hian inbiakna thui tak an kalpui tawh nia ziah niin, a man hi euro maktaduai 27 (pound maktaduai 27) vel a ni dawn niin ziah a ni bawk.

Hummels hi Bayern Munich academy chhuak niin, kum 2008 khan loan-in Dortmund hi a zawm a, a kum lehah Dortmund hian kum 30 mi hi a nghetin an la zui nghal. Dortmund-ah a hming chherin kum 2016 khan Bayern-ah Hummels hi a kir leh a, tunah hian Dortmund-ah bawk a kir leh dawn nin a lang.

Dortmund-a a awm lai hian Hummels hian game 309 lai a khel hmana, Dortmund hi Bundesliga title vawi hnih lakpui hmanin DFB-Pokal pakhat a lakpui bawk.

Dortmund-a awm lai hian khawvela centre-back tha ber zinga ngaih a ni chho va, chu chu Bayern Munich leh Germany tan pawh chhawm nung zelin, kum 2014 khan Germany World Cup-ah a lo champion pui tawh bawk.

Kum thum Bayern-a hun a hman chhungin Hummels hian trophy pasarih a chawi tawh a, kumtin Bundesliga title an la la ziah.

Hummels mai bakah hian Bayern centre-back dang Jerome Boateng pawh a chhuah a rinawm a, Bayern hian centre-back thar an melh thuai a rinawm a ni.

Copyright © inkhel.com 2024. All rights reserved.