Kum 20 mi Belgian midfielder Adnan Januzaj chuan nikum nipuiah khan loan-in Manchester United atangin Germany club Borussia Dortmund a zawm a, mahse beisei a phak loh em avangin January transfer window-ah United-ah an kir tir leh ta ringawt a ni.
Tun season tluana Dortmund-a khel tur a nih laiin thla 5 em pawh a awm tling lo, Old Trafford-ah a hawng leh ta zawk a. Borussia Dortmund tan Adnan Januzaj hian game 12 a khel ve hman a, goal erawh a khung ta lo a ni.
Jurgen Klopp hnua Borussia Dortmund enkawltu Thomas Tuchel chuan Januzaj chu United a ngaih lutuk avanga Germany-a hlawhtling ta lo niin a ngai.
"A taksa peng pakhat chu Manchester-ah a awm tlat a, a nu nena an inzawmna lai hrui kan chhu chat thei lo a ni. Engkim mai kha United nen a khaikhin zel a, chu chu a hlawhchham chhan chu a ni," tiin Thomas Tuchel chuan FFT a hrilh.
Man Utd-a a kir leh hnuah Januzaj chu United tan vawi khat a inlan leh tawh a, Southampton si khat faia an hneh loh tum khan Van Gaal chuan Januzaj hi bench atangin a luh tir a ni.