Roger Federer chuan world no.1 Novak Djokovic-a hnung zuiin ATP Finals London-a khelh mekah semi final a lut.

ATP Finals-ah hian Federer hian a game hmasa berah Japanese player Kei Nishikori chu straight sets-in a hneh lova, a vawi khat nan Federer chu straight sets-in  tlawm mahse game hnih a zawnin a chak zuia semi final-ah a in vaw tling ta a ni.

Federer hian a career chhungin title 99 a la tawha, tunah hian title 100 lak theihna hun tha a tan a inhawng mek. Federer hian semi final lut tur hian Kevin Anderson chu 6-4, 6-3 in a hneha, Wimbledon-a a hneh loh Anderson lakah phuba la in, Lleyton Hewitt Group hmahruaitu a ni nghal bawk.

Federer chuan, “Career title 100 la thei dinhmunah ka ding mek a, mahse chulam chu ka ngaihtuah duh lo. Chumi lama ka rilru ka pek chuan ka phawklek dawn a, chuvang chuan a tul lovah ka inti hah duh lo.

Novak a awm chhung chu thil awlsam a ni dawn lova, a khel tha em em bawk. Semi final-a ka hmachhawn tur hi ka hre lova, Novak pawh a ni thei. Thil awlsam tak a ni dawn lo.” a ti.

ATP Finals-ah hian Djokovic leh Federer bakah Kevin Anderson-te chuan semi final an lut tawh a, Alexander Zverev, John Isner leh Marin Cilic-te chuan semi final hmun pakhat la awl chu an inchuh dawn a ni.