11 Oct 2020 09:48

bakteaJr.

Mizo tlangval

​Djokovic hneh tur chuan hma ka sawn belh a ngai: Nadal

Zanina French Open final khel tur Rafael Nadal chuan, final-a a tumpui tur Novak Djokovic chu a hneh dawn a nih chuan, hma a sawn belha, tum dang aia a khelh that zawk a ngaih thu a sawi.

Nadal hi French Open-a champion ngun ber niin, vawi 12 ngawt a champion tawha, zaninah a champion leh a nih chuan, Grand Slam title 20 a lakna ni dawnin, Roger Federer a nihrual pui chiah dawn.

Nadal hi kum 16 chhungin Roland Garros-ah hian vawi hnih bak a la tlawm lova, a hneh loh zinga pakhat hi Djokovic hi a ni nghe nghe.

Nadal-a hmachhawn tur top seed Djokovic hi kumin 2020 chhungin vawi khat chiah a la tlawma, chu chu US Open-a default a nih tum kha a ni.

Kum 34 mi Nadal chuan, “Novak hmachhawn tur hi chuan a tha thei ang bera ka khelh a ngai tih ka hriaa, ka khelh that ber tum a nih loh chuan Novak hmachhawn hi a hautak hle thin. Record ka neih that em emna court a ni erawh ka tan a tha a, mahse ani pawhin he hmunah hian record a nei tha ve tho a, kum tin mai hian final round ho a lut ziah.

“Hmachhawn harsa leh hautak ber zinga mi a ni a, mahse kei pawh a tha thei ang bera khelh ka tum dawn. Hma ka sawn belh a ngai tih ka hria a, semi-final-ah khan hma ka sawn belh ngeia, mahse final atan chuan a la tawk lo. Hma ka la sawn belh a ngai a ni. Chu chu ka tum ber a ni a, chumi tur chuan theihtawp ka chhuah dawn a ni,” a ti.