10 Oct 2020 08:53

bakteaJr.

Mizo tlangval

​Djokovic-a’n Tsitsipas hnehin French Open final a lut

Top seed Novak Djokovic chuan French Open semi-final khelh hnuhnun zawkah fifth seed Stefanos Tsitsipas a hneha, a vawi nga nan French Open final khel turin a invaw tling.

Kum 33 mi Djokovic hian Greek mi Tsitsipas hi 6-3, 6-2, 5-7, 4-6, 6-1 in a hneha, kum 2016 hnuah Roland Garros-a champion lehna hun a nei.

Djokovic hian a tir set hnih awlsam takin a la a, straight set-in a chak mai dawna a lan hnuah, Tsitsipas a luhlul zia kan hmua, set ngana thleng an inbei ta a ni.

Djokovic leh Tsitsipas te hi darkar thum leh minute 45 an inkhela, an inkhelh zawhah Djokovic chuan, “Ka taksa hi chu a hah em em lova, inkhel ropui tak niin ka hria. Ka tha a, ni khat leh a chanve chawlhna hun ka nei dawna, a tawk hlein ka hria. Rafa nena ropui tak inhmachhawn hun ka nghakhlel tawh a ni,” a ti.

Djokovic hian final-ah vawi 12 Roland Garros-a champion tawh Rafael Nadal a hmachhawn dawna, an pahnih hian vawi 56 inhmachhawn tawhin, tumah anni aia inhmachhawn hnem zawk tennis-ah an awm lova. Grand Slam-a an vawi 9 inhmachhawnna tur a ni a, Djokovic hi Roland Garros-ah vawi khat a champion ve tawh bawk.

Djokovic hian Nadal a hneha, a champion chuan, Grand Slam title 18 a lakna a ni dawna, pakhatin Nadal a pha lo anga, pahnihin Roger Federer a pha lo bawk dawn. Nadal hi a chak erawh chuan, a Grand Slam title 20-na a ni dawna, Federer-a record a nihrual pui chiah dawn a ni.

Final hi tun Sunday (11/10/20) zan dar 6:30-a khelh a ni ang.