Novak Djokovic chuan Serbia rama coronavirus donaa hman atan Zirtawpniah khan €1 million ($1.10 million) a thawh.

Nikum kum tawp lam atanga China rama darh tan COVID-19 chuan khawvel a chawk buai chho mek a. Khawvel ram hrang hrangah a darh tawh a, tun thlengin he hri leng vang hian mi 24,000 chuang zet chuan nunna an chan phah tawh a. Infiamna chi hrang hrang pawh chhunzawm theih a ni lo a, an chawl thup mai a ni.

Rafael Nadal chuan Spain rama infiammite hnenah he hri leng mek dona atan hian €11 million ($12.13 million) thawh khawm a rawt a. Roger Federer pawhin ama pawisa Swiss Franc 1 million ($1.04 million) chu Switzerland rama he hri leng vanga harsatna tawk chhungkuate tana hman turin a thawh bawk a ni.

Djokovic chuan, “Khawvel hmun hrang hranga hri leng vanga theihtawp chhuaha thawktu zawng zawng chungah lawmthu ka sawi a. A bik takin damdawi lampang thiamte hi an fakawm ka ti tak meuh a. Kan ram Serbia-ah pawh coronavirus kai tanpui leh chhawmdawl kawngah theihtawp chhuahin hna an thawk a ni,” a ti.

“Vanduaithlak takin ni tin hian mi tam takin hri leng hi an kai belh ve zel mai a. Ka nupui Jelena nen hian a mamawhte hman tangkai atan bungraw leina tur thawh tha kan ti a. Ventilator leh damdawi thil vel leina atan €1 million ($1.10 million) thawh kan titlu ta a ni,” a ti bawk.

Serbia chuan tun thlengin coronavirus kai 457 an finfiah tawh a, heng zingah hian mi 7 chuan nunna an chan tawh a ni.

World No. 1 Novak Djokovic chu coronavirus vanga infiamna an chawlh hma deuh khan a che tha chho hle a. Kum 32-a upa Serbian star hi tun season chhungin a zawnin match 18 ah a chak zawn tawh a. Serbia chu ATP Cup a lakpui hman a, Melbourne khawpuiah Australian Open title la lehin, a vawi 5-na atan Dubai Tennis Championships title pawh a la a ni.

June 7 thlengin tennis khawvel chuan chawlh an puang rih a, an chawlh chhung hian Djokovic te chu chhungkuain an awm nasa a, hei hi nuam a tih thu a sawi nasa hle.