Novak Djokovic chuan tunlaia Australia ram kang avanga harsatna tawkte tanpuina atan $25,000 a hlan.

Tunlai hian Australia-ah ram kang vangin an buai nasa hle a, New South Wales leh Victoria te chu a nghawng nasat pawl an ni bawk a. Ram kang avanga harsatna tawk tam tak an awm a, ramsa leh rannung tam tak an thih phah bawk a ni.

Chhawmdawl hna an thawk chho mek a, hemi kawngah hian mi chi hrang hrangin tanpuina an pe khawm mek zel a. Heng zingah hian tennis star lar Novak Djokovic pawh a tel ve a, a hma deuhin Maria Sharapova pawhin tanpuina hi a lo pe ve tawh bawk a ni.

Australian Open atana inpuahchah mek Sharapova leh Djokovic te chuan tanpuina hi $25,000 ve ve an pe a. Anni bakah hian infiammi chi hrang hrang pawhin tanpuina pawisa hi an thawh ve tawh hlawm a ni.

Maria Sharapova chuan, “January thlaah hian Australia hi kum 15 chhung chu ka in a ni chho tawh a, tunah pawh a hun a rawn inher chhuak leh dawn tawh a ni,” tiin Twitter-ah a tarlang.

“Kangmeiin ram tha tak mai a kang chhe chiam mai te, helai ram vela cheng nungcha thahnem takin nunna an chan te, harsatna lian tak an tawk han hmuhte hian a lungchhiatthlak ka ti hle a ni,” a ti.

“Ram kang vanga harsatna tawkte tanpuina atan hian a bul tan nan $25,000 ka thawh phawt dawn a. Djokovic hian ka tih ang hi a rawn ti ve duh dawn em? Kan tanho a tul lai tak a ni,” a ti bawk.

Djokovic chuan Sharapova chona chu a chhang nghal a, “Aw, Maria, tanpuina i pek ang zat $25,000 hi kei pawhin ka pe ve nghal a. Hma lakna tur tam tak a awm a, chutianga hman atan chuan pawisa hi ka pe ang a. Australia ram buaina tiziaawm thei tur hian kan inpeih reng a ni,” a ti.

World No. 2 Novak Djokovic chuan a vawi 8-na atan Australian Open title lak a tum dawn a, January 20 atanga Melbourne khawpuia inelna tan turah hian a champion thei a nih chuan title lian 17 a la tling thei tawh dawn a ni.