12 Feb 2016 05:57

Inkhel

Mizo Sports Website hmasa ber

Division II-ah Bethlehem BC an champion; Division 1 final VR4 1-1

MBBA League 2016 Division II ah Bethlehem BC an champion a, division I champion erawh hriat theih a la ni lo.

Nizan khan Division I final Game 2 ah VR4 chuan 104 - 87 in Hollow BBSP an hneh a, ti hian vawi 1 ve ve chakin final game 3 an khelh a ngai dawn ta a, inrinni zana chak zawk zawk an champion ang a, Mizoram Super League-ah an kaisang nghal bawk ang.

Final Game 2, Hawla Indoor stadium-a inkhel hmuhnawm takah bul tan tha zawk Hollow in halftime thlengin hma an hruai a, an chak tlang mai pawh a rinawm hman hle a ni. Mahse quarter thumna tawp lam atangin VR4 in an pawtthla a, fal taka hma hruai zuiin a tawpah point 17 zetin hnehna an chang ta a ni. VR4 tan Rinnunga'n point 16 a thun a, Hollow lamah Bungkawn veng rawlthar Thazuala chuan basket ngah leh hle mahse a team a chakpui zo lo.

Final Game 3 hi inrinni zan dar 8:00-ah khelh a ni ang.

Nimin tlai dar 5-a khelh Division II final ah Bethlehem BC chuan 74-48 a Tuikual South Basketball Youth BC hnehin an champion. Bethlehem BC hian quarter tir atanga hma hruai chho nghalin an game a mar tha hle a a tawpah point 27 zetin hnehna an chang ta a ni.

Team pahnihte hian season tharah Division I khelin MSL an beisei ngam tawh dawn a, an chetthat dan a zirin MSL-ah an hmel kan hmu zel lovang tih a sawi theih loh.