Division I champions Hollow

14th February 2016, 10:02PM

MBBA League 2016 Division I-ah Hollow BBSP an champion a, season thara Mizoram Super League team pakhat an ni ve dawn ta.

Inrinni (Feb.13) zan (dar 8:00) khan Hawla Indoor Stadium, Republic Vengthlangah MBBA League Division I final game 3 khelh a ni a, Hollow BBSP chuan 81-76 a VR4 hnehin an champion a, VR4 lakah 2-1-in hnehna an chang.

Final Game I-ah Hollow hian 86-87 in VR4 an hneh a, Game 2-ah VR4-in 104-87 in hnehna an chang ve thung. Game 1 ve ve chaka an inhnehtawk avangin final game 3 khelh a ni a, Hollow-in hnehna changin season tharah MSL team an ni dawn ta a ni. Chak lo VR4 pawhin playoff an khel thei dawn a, MSL-a a hniam ber Division I-ah an tla ang a, a dawttu leh VR4 ten playoff an khel ang. A chak zawk zawkin MSL an khel thei dawn a ni.

Final Games 3-ah team pahnihte an inhnehtawk kher mai a, hmahruai fal hlei thei pawh awm lovin an inchungnun chhawk a, half time-ah point 35 ve ve an thun. Quarter thumnaah Hollow game a kangin point 27 an thun belh a, hei hi an thatpui pha kher mai. Hma an hruai chhova, quarter 4-naah VR4-in lehthal tumin point thun hnem zawkah tang mahse an pawtthla zo ta lo. 

Hollow BBSP tan hian Bungkawn rawlthar Vanlalthazuala bawk a tal na leh a, point 36 thunin mimala chetha ber a ni. Hollow team hi rawlthar rual an ni a, an innghahna leh player pawimawh Thazuala hi kum 17 mi, St.Pauls-a Class XII zirlai a ni.

Final Game 2-a VR4 an hneh loh tum khan a khel tha tawk lova, Hollow an chak loh phah a tih theih hial ang. Final game I-ah khan point 41 a thun a, hemi hmaa Dawrpui Aces an hmachhawn tum khan point 51 zet thun tawhin MBBA league 2016-a player langsar leh basket ngah ber pakhat a ni.

Copyright © inkhel.com 2024. All rights reserved.