05 Jun 2020 09:57

bakteaJr.

Mizo tlangval

Disney World-ah NBA an khel zo dawn

Coronavirus avanga NBA season kal lai khailak mek chu Florida, USA-a awm Walt Disney World Resort-ah khelh chhunzawm a ni dawn.

NBA season kal lai hi July ni 31 atangin an khel tan leh a, season kal lai khelh hmabak la awm zawng zawng te chu Disney World-ah hian an khel zo ang.

Playoffs khel tur zawng turin Western Conference team 13 leh Eastern Conference team 9 te an la inel dawna, game zawng zawng te chu entu mipui awm lova khelh tur a ni.

Disney Resort hi entertainment complex lian tak niin, Walt Disney Company peng pakhat Disney Parks, Experiences and Products enkawl lai a ni a, coronavirus avangin March ni 15 atang khan khar a ni.

NBA chuan Disney Resort hi an season kal lai khelh chhunzawm nan mai bakah, practice nan leh player leh a tul dang te season a zawh hmaa an khawsak theih nana hman theih an beisei.

Disney World hian mi 5000 len theihna indoor basketball court an nei a, hei hi March ni 11 atanga khailak tawh NBA season kal lai khelh zawh nan hman a ni dawn.

Season kal laiah hian Milwaukee Bucks chuan Eastern Conference-ah hma an hruai meka, LA Lakers chuan Western Conference lamah hma an hruai mek thung a ni.