24 May 2020 10:43

bakteaJr.

Mizo tlangval

​Disney-ah NBA khelh chhunzawm an tum

Florida, USA-a awm Walt Disney World Resort-ah NBA chu July thla chawhnu lama chhunzawm tum mek a ni a, inbiakna kalpui mek a ni.

NBA hi coronavirus avangin March ni 11 atang khan season kal lai a khailak tawha, July thla tawp lam hi chuan chhunzawm theih tura beisei a ni.

Disney Resort hi entertainment complex lian tak niin, Walt Disney Company peng pakhat Disney Parks, Experiences and Products enkawl lai a ni a, coronavirus avangin March ni 15 atang khan khar a ni.

NBA chuan Disney Resort hi an season kal lai khelh chhunzawm nan mai bakah, practice nan leh player leh a tul dang te season a zawh hmaa an khawsak theih nana hman theih an beisei.

NBA season kal lai chu tihtawp a ni mai dawn anga sawi awm fo mahse khelh zawh tum mek a ni tih a langa, tunah hian Milwaukee Bucks chuan Eastern Conference-ah hma an hruai meka, LA Lakers chuan Western Conference lamah hma an hruai mek thung.

USA-ah hian mi maktaduai 1.64 velin coronavirus an kai tih hmuhchhuah tawh a ni a, mi nuai khat dawnin an thihpui tawh bawk a ni.