28 Oct 2018 07:27

inkhel

Dirk, Shaq leh Kobe lehpel thei LeBron James

Los Angeles Lakers chuan San Antonio Spurs hneh lo mahse LeBron James chuan bung thar a kai tho a, NBA khawvela point score hnem lamah parukna a ni a, la khel mek zingah chuan a thun hnem ber a ni.

LeBron James chuan San Antonio Spurs nen an inkhelh hian point 35 a score a, point a score tawh zawng zawng chu 31,202 niin, Dirk Nowitzki leh Lakers player ropui Shaquille O’Neal te chu a lehpel tawh a ni.

Lakers chuan 110-106 in Spurs hi an hneh lo a, James hian point 35 a thun bakah rebound 11 a la bawk a, game khata point 30 a thun tlin theih vawi 432-na a ni chiah a, Kobe Bryant chu lehpelin point 30 thun tling hnem zingah palina a ni thei chiah a ni.

Kum 33-a upa LeBron James chuan, “Basketball player ka hmachhawn tawh te, ka lo khelhpui tawh te, an khel ka lo thlir thin te, NBA khawvela ka luh ve hma daiha ka lo ngaihsan tawh thenkhatte ka lehpel thei hi lawmawm ka tih mai bakah thil chhuanawm tak niin ka hria,” a ti.

“Dirk Nowitzki hi NBA player zinga ka duh ber pawl a ni reng a, he infiamna khawvelah hian Shaq tluka chungnung hi an vang khawpin ka hria a. Player ropui tak takte nen huang khata han awm theih chu ka tan chuan a ropui zual hle a. Ka chawr chhuahna te nen ngaihtuah phei chuan awihawm loh khawpin ka thleng sang a tih loh theih loh,” a ti bawk.

A sawi zelnaah, “Akron, Ohio atanga lang chho ve ka ni a, helai hmunah hian African-American hi an dingchhuak ngai lo hle a. Hei vang tak hian kan khua atanga mi hriat hlawh han nih chu a nuamin a danglam ve hrim hrim mai a. Eng emaw thil ropui deuh ka ti thei zel a nih pawhin keimah ang bawka kan khuaa seiliante tan ka hlan zel ang,” a ti.