Di Maria-a'n Man Utd tan beisei a phakloh chhan a sawi.

20th June 2015, 08:06PM

Real Madrid atanga £60m laia Manchester United in an lei Angel Di Maria chuan Manchester United tan a chet that theihloh chhan a sawi.

Di Maria hi season kalta khan United tan a khel thalo hle a, bul tan tha hle mahse season tawp lam game 10 ah game 1 chiah a start pha a, United a chhuahsan dawn niin thuthang pawh a awm hman hial a ni.

United tan a season hmasaber a beisei a phakloh chhanah Di Maria hian World Cup chu puh in, "World Cup ah kan theihna zawng zawng kan hlan a, World Cup hma a Di Maria in hriat leh World Cup hnu lama Di Maria kha a danglam vek tawh a ni.

"World Cup ah champion thei ta lo mah ila ka nun a hun hlimawm ber erawh a ni a, a chhan chu hun rei tak hnuah Argentina in Final kan lut a, kan theihna zawng zawng Argentina tan kan hlan bawk a ni" tiin a sawi.

Copa America khelh mek a ni avangin season kalta ang bawk khan Di Maria hian United pre-season programme te a zawm veleh thei lovang.

Copyright © inkhel.com 2024. All rights reserved.