Kumin April thlaah khan a hnungzang na vangin Asian Athletics Championship 400-metre race-ah a tlan tluanchhuak thei ta lo a, a harsatna a inhnehtir duh lo a, July thla a inher chhuah meuh chuan thla khat chhungin gold medal panga ngawt a la zui a ni.
Assamese tleirawl Hima Das hi tunlaia Indian sprinter lar tak mai a ni a, Jakarta, Indonesia-a 2018 Asian Games 400-metre intlansiakah khan second 50.79 chhung hun a hmang a, hei hi Indian national record a ni mek a. Tun hnaiah a che tha chho zel a, record dang pawh hi a la neih belh zel a beiseiawm hle.
Kum 19-a upa, ‘Dhing Express’ tia hriat lar Hima Das hian Inrinni khan tun thla chhunga a pangana atan gold medal a lak belh leh a. Czech Republic lama intihsiakna, Nove Mesto nad Metuji Grand Prix ah a tel a, 400-metre intlansiakah second 52.09 chhungin a thleng a, gold medal hi a la a ni.
July 2019 thla chanve a pel deuh awrh chauh a, heti chunga gold medal panga ngawt mai a la thei hi thil namai a ni lo hle a. Gold medal a lak panga chungchang hi han bih chiang ila a tha awm e.
200-metre, Poznan Athletics Grand Prix, Poland
Hima Das hian July 2 khan gold medal a la hmasa ber a. Kumin chhunga a vawi khatna atan 200-metre intlansiakah a tel a. 400-metre bikah world junior champion a nih bakah national record siamtu niin, 200-metre intlansiakah hian second 23.65 chhungin a thleng a, gold medal a la a ni.
200-metre, Kutno Athletics Meet, Poland
July 7 khan Poland ramah tho 200-metre intlansiakah a tel zui leh a, hetah hian Hima Das chu second 23.97 chhungin a thleng a, gold medal hi a la leh a. VK Vismaya chu second 24.06 chhungin a thleng a, silver medal a dawng ve bawk a ni.
200-metre, Kladno Athletics Meet, Czech Republic
Khawvel huap inelnaa gold medal pahnih a lak atanga ni 6 velah Hima Das chuan a dang a lak belh leh a. July 13 khan Czech Republic-a 200-metre intlansiakah telin, second 23.10 chhungin a tlan thleng a, gold medal a dawng leh a, July thla chhunga gold medal pathum a lakna chiah a ni.
200-metre, Tabor Athletics Meet, Czech Republic
July 17 khan Czech Republic-ah tho 200-metre intlansiakah a tel zui leh a, hemi tum hian second 23.25 chhungin a tlan thleng a, kum 19-a upa Das hian tun thlaah gold medal pali a dawng ta der mai.
400-metre, Nove Mesto nad Metuji Grand Prix, Czech Republic
July 20 (Inrinni) khan Hima Das chu hming a chherna ber 400-metre intlansiakah a tel a, Czech Republic-ah hian second 52.09 chhungin a thleng a, tun season chhunga 400-metre bika a tlan that ber a la ni a, gold medal hi a dawng a. Hemi hma hian tun season bika a tlan that ber chu second 52.88 niin, nikum Asian Games-ah khan second 50.79 chhungin a tlan thleng a, a tlan that ber tum a la ni.
Dhing Express chawr chhuahna
Hima Das hi Assam chhunga thingtlang khaw pakhat Kandhulimari khuaa piang niin, an khua hi Dhing khawpui bul lawka awm a ni a. Ronjit Das leh Jonali Das te fa panga zinga naupang ber niin, a nu leh pa hi lo neia eizawng thin an ni.
Dhing Publi High School ah a kal thin a, football ngaina em em thin niin, an sikula mipa zingah hian football chu a khel fo thin a, football khela eizawn chu a chak ber a ni thin a. Amaherawhchu, hmeichhe tan chuan India ramah football khelh chu eizawnna tlak a ni lo tih a hre chiang hle.
Tum mumal a neih loh lai tak hian an school physical education teacher Shamsul Hoque chuan intlansiak lama lut turin thurawn a pe a. Hima Das chuan intlansiak lampang chu a ti chho a, a tifuh ta hle a ni.
Zirna lamah chuan Hima Das hian kumin May thlaah khan Assam Higher Secondary Education Council atangin pawl 12 a zo a ni.
Intlansiak a luhchilh hnuah a che fuh chho ta hle a, India ram hming tithatu a ni chho ta fo a, hei vang hian mi hriat pawh a hlawh chak hle a. September 25, 2018 khan President of India chuan Arjuna Award a hlan nghe nghe a ni.
November 14, 2018 khan India ram thalaite zinga a hmasa ber ni turin UNICEF-India chuan ambassador atan an ruat a. Assam sorkar pawhin an state chhunga infiamna lam bika ambassador atan an ruat bawk a ni.
Hima Das hi Assam atang chuan infiammi zingah khawvel ram hrang hrang inelnaa gold medal la thei hmasa ber dawttu niin, a hmain Bhogeswar Baruah chuan a lo la tawh a. India rama infiammi zingah chuan IAAF World U20 Championship-a gold medal la thei hmasa ber a ni.