Arsenal leh Tottenham Hotspur te chuan Pathianni zan hian Emirates Stadium-ah North London Derby an khel dawn a. Club inhal tak mai pahnih inkhelh hma hian Spurs manager chuan Arsenal manager nen an inthian thatna chu an inkhelh vang hian a chhiat phah dawn loh thu a sawi.
Tottenham Hotspur manager Mauriio Pochettino leh Arsenal manager Unai Emery te chu thian tha tak mai an ni a, Premier League bikah a vawi khatna atan an inhmachhawn dawn a. Anmahni chu thian tha tak ni mahse North London club pahnihte inhal dan chu sawi chian ngai loin football ngainatute chuan an hre tlang vek a. Derby an khelh phei chuan boruak a sosang thei hle a, hetiang a lo nih tawh thin avang hian Pochettino chuan khelmualah eng boruak pawh thleng mahse Emery nen thian an nihna chu a khawih buai dawn lo niin a sawi a ni.
Mauricio Pochettino chuan, “Club hrang ve veah kan awm a, kan club enkawlte an inhmachhawn dawn a. Tun hma atang tawha club inhal tak an ni tih chu kan hre sa vek a, thian tha ni mah ila club chu kan dah hmasak a ngai a, chak kan tum ve ve dawn a. Eng boruak pawh thleng se inkhelh hma leh inkhelh hnuah pawh thian tha kan nih chhunzawm reng dawn a ni,” a ti.
2012 khan Unai Emery chuan Valencia chhuahsanin Spartak Moscow a enkawl a, a chhuah dawn hian a aia kum khata naupang Pochettino chu Valencia enkawl tur hian a lo rawt a. Pochettino chuan hetih lai hian La Liga club hniam zawk Espanyol a enkawl mek a, Emery duhsakna chu lawmawm a tih rualin Espanyol enkawl chhunzawm a thlang ta a ni.
Pochettino chuan, “Spartak Moscow lam pan tawh Emery chu ka bia a, duhsak taka ka hming a lo sawi lan avangin lawmthu ka hrilh a. Mahse, ka club enkawl lai mek tana rinawm chhunzawm zel ka duh avangin min duhsakna chu ka pawm ta lo a ni,” tiin a sawi.
Kum li chhung Tottenham a enkawl hnuah Pochettino hian trophy a la lakpui lo a, 2010 hnuah khan Arsenal khelmualah Spurs hi an la chak leh miah lo bawk a. Vawi 25 an inhmachhawn hnuhnungah 2010 kuma 3-2 a Tottenham an chak bak kha chu Emirates Stadium-ah chak hmel an la hmu miah lo a ni.