02 Dec 2018 01:04

inkhel

​Deontay Wilder leh Tyson Fury-te chak zawk awmlo

Boxing khawvelin Deontay Wilder vs Tyson Fury a nghakhlel tawh a, mi thenkhatin knockout anih loh pawhin chak zawk awm ngei turin an beisei a, boxer tha pahnihte an intum ta reng a, chak zawk awm lovin an inhnehtawk ta thung a, Wilder erawh WBC Heavyweight Champion a ni zui ta thung.

Fury vs Wilder boxing match hi Los Angeles, USA-ah neih a ni a, boxer pahnihte hi an intum hma pawhin boruak an nei lian hle. Mipui beisei leh nghahhlelh chu ring chhungah neih a ni ta a, Fury-a hian a jab a hmang thiam hle a, a hnek fuh leh zauh zauh thin a, Wilder-a hian chiang takin a hnek fuh theilo a ni deuh ber.

Round 9 naah erawh Wilder-an a hnek thlu a, Fury erawh tlawm mai a tumlo a, a rawn tho leh thei. Hemi hnu Round 10 leh 11 velah pawh Fury-an fimkhur takin a khel chho a, round 12 naah chiang zetin Wilder-a'n a hnek thlu leh thung. Hetah erawh Fury a thawh an ring tawhlo hlawm a, rinloh takin Fury a rawn tho leh thei a, round pawh a zo ve deuh nghal mai.

Boxing fans lamin Fury chak zawk turin an ring hlawm a, hetih lai hian round 9 leh 12 ah Wilder-a'n a hnek thluk avangin rin ngam a har thung. Judge pathum zingah Robert Tapper chuan 114-110 in Tyson Fury a hmu chak zawk a, Alejandro Rochin chuan 115-111 in Wilder chakah a ngai a, Phil Edwards erawhin 113-113 in a inhnehtawk tir thung. Hetiang anih tak avangin split draw(inhnehtawk) a ni ta thung a, Wilder erawh champion a ni zui ta thung.

Fight zawhah Wilder-a chuan, " Round 9 leh 12 naah ka hnek thlu a, chak zawkah la inngai. Kan pahnih hian khawvela boxer tha ber pahnih kan ni a, kan intum leh ngei hi ka ring, " a ti. Tyson Fury pawhin, " Ka chak zawk tih ka chiang a, vawi hnih min hnek thlu mahse ka hnek fuh hnem zawk a, ka chak zawk tih ka hre chiang. Germany ramah Klitschko tum turin ka kal a, tunah Los Angeles-ah Wilder tum turin ka kal leh bawk a, kan la intum leh ngei ka ring, " a ti bawk.

Fighter pahnihte hian professional boxing record-ah hnehloh an la neilo ve ve a, nakum lamah pawh boxer pahnihte hi an la inhmachhawn leh ngei a beiseiawm hle.