Las Vegas khawpuia mipui tam tak pungkhawm hmaah Deontay Wilder-a chuan khawvela boxer hnek na ber anih zia a lantir nawn lehin 7th round naah Luiz Ortiz knockout hmangin a hneh a, WBC Champion kawnghren a humhim chhunzawm.

Ortiz leh Wilder te hi March 2018 khan an inhnek tawh a, an insual hmasak pawh hian Ortiz hian a hneh dawn niin a lang hman a, round a rei takk hnuah erawh Wilder-a kuttum na lutuk a tuar zo ta nganglo a, a tlawm ta thung.

Boxing khelhna hmunpui Las Vegas khawpuia boxing ring chhunga an inhnek hun khawvelin a nghakhlel a, mipui thawm a ring tha hle. Round hmasa ber atangin Ortiz-a hi Wilder hnek fuh theilo turin a insiamrem zung zung a, boxing khawvelin Wilder chak tawhlo turin a ring hman hial.

Round 3 naah Wilder-an a hnek fuh, tawnhriat ngah tawh Ortiz erawhin chhanna tha tawk a pe thei zel. Round 1-6 an inbeih chhungin Ortiz a chungnung zawkah trangin chak ngei turin a lang hman. Round sarihna ah boxing khawvela hnek na ber Wilder-a kuttum dinglam a dawng fuh chiah chu a tlusawp ta si, referee Kenny Bayless-an 1,2,3.. chhiar zui nghalin 10 count-ah pawh a ding thei ta si lova, boxing khawvelin Wilder-a ropuizia a hmu leh thung si.

An insual zawhah Wilder-a chuan, "Ortiz hi boxer tha a ni a, ka hmachhawn thei hi ka lawm hle a, chutih laiin boxing khawvelah ka ropui zual zel ang, " tiin a inhrosa.

Heti hi chuan Wilder leh Fury inhnek leh ngei tura tihfel anih thuai a rinawm a, an intum hmasak hian Fury chak ngei tura ngaih anih laiin sawisel hlawh takin an inhnehtawk ta si a, an inhnek leh thei anih ngat chuan khawvela heavyweight boxer tha ber zawnna ang te pawhin a tih theih ang.