Josep Maria Bartomeu chuan Ousmane Dembele chu Barcelona star hlui Neymar aiin a tha daih zawk niin a sawi.
Brazilian forward Neymar chuan 2017 khan Camp Nou a chhuahsan a, €222 million (£191 million/$251 million) zetin Paris Saint-Germain a zawm a, khawvela player man to ber niin, tun thleng hian khum theitu an la awm rih lo a. A hmun ruak luah tur hian Borussia Dortmund atangin Ousmane Dembele chu Barca hian €105 million (£90.7 million/$118.7 million) in an la lut ve leh a ni.
Ousmane Dembele hian Camp Nou a pan hnuah inelna hrang hrangah goal 18 a thun tawh a, La Liga bikah goal 11 a thun tling tawh a. Barcelona president Josep Maria Bartomeu chuan kum 21-a upa France winger hi a fak hle.
Bartomeu chuan, “Tun hnaiah Neymar chu rawn kir leh thei tur anga sawi a awm leh thin a, mahse kan hnena rawn kir thei a ni tawh lo a. Kan hma hun tur hi uluk takin kan ruahman fel tawh a, hetah hian Dembele leh Philippe Coutinho te chu an pawimawh dawn hle a, Neymar te ang tan chuan hmun a awm thei lo ang,” a ti.
“Tuna kan player neih saah hian kan lungawi khawp mai a, Dembele hi Neymar ai chuan a tha daih zawk a, professional player dik tak a ni a. A kum pawh a la naupang a, heti chung hian club lian deuh maiah a rawn lut a, a tan chuan boruak a sang hle ang tih pawh a hriat theih a. Heti chung hian a insiam rem zung zung thei a, hei hian Neymar aia a chungnun zia a tilang chiang hle,” a ti bawk.
Philippe Coutinho chuan January 2018 khan Liverpool chhuahsanin Camp Nou hi €160 million zetin a zawm a. Spain ram a pan hnu hian bul tantu zingah a tel tam lo hle a, hei vang hian club dang nen an sawi zawm chho mek a. Coutinho beiseitu nia an sawi zingah Manchester United leh Chelsea te chu a langsar ber pawl an ni.
Coutinho chungchang sawiin Bartomeu chuan, “Coutinho hi player tha deuh mai a ni a, coach pawhin a ring tawk hle a. Kan hnenah contract a la nei a, hmun dang a la pan dawn lo a. Amah duhtu an awm a nih chuan release clause hi an rawn ching fel a nih ngawt loh chuan an lei thei lo ang,” a ti.
Barcelona player te chu tun hnaiah club thenkhat nen an sawi zawm nual hlawm a, heng zingah hian Ivan Rakitic leh Samuel Umtiti te chu an langsar hle a. Anni player pahnih bik hi Inter Milan, Arsenal leh Manchester United te nen an sawi zawm a ni.