​Delhi Dynamos-in Xisco Hernandez an lalut

25th June 2019, 09:06PM

Indian Super League club Delhi Dynamos chuan Bengaluru FC atangin Xisco Hernandez an lalut fel.

Bengaluru chu season hmasa khan ISL-ah an champion a, he season-ah hian Hernandez hi an player pawimawh tak a ni nghe nghe.

Season liamta khan kum 29 mi Hernandez hian Bengaluru tan vawi 20 a khel a, goal khat khungin, assist panga a nei bawka, a thawhhlawk thawkhat hle.

Hernandez hi player versatile tak a ni a, playmaker ni mahse wing lamah a khel thei ve ve bawk a, centre midfield leh attacking mdidfield-ah te pawh khel thei vekin, season hmasaa a goal khung chhun hi NorthEast United laka a thun a ni.

Goal nawr lam chauh lovah pawh Hernandez hian a thawhhlawk viau a, season liamta khan tackle 31 neiin, interception 16 a nei bawk.

Hernandez hi passing lamah pawh a theuneu lo viau a, season liamta khan pass 703 neiin, a pass zawng zawng atangin 68.42% chu a dik. A passing a chhiat loh avangin Bengaluru manager Carles Cuadrat chuan centre-midfield ah pawh a hmang nasa hle a ni.

Delhi Dynamos chuan season thar atana an inbuatsaihnaah Hernandez lo hi midang pahnih an lalut tawh a; Barcelona B defender Diawandou Diagne leh Jamshedpur FC winger Jerry Mawihmingthanga-te an lo lalut tawh a ni.

Copyright © inkhel.com 2024. All rights reserved.