Delhi Dynamos chuan Jamshedpur FC atangin Jerry Mawihmingthanga chu lak luh an tum mek a, season tan leh hma chuan lak hman an inbeisei thu an sawi.

Mizo winger Jerry Mawihmingthanga hian Jamshedpur-ah kum khat chhung atan contract a la nei a, heti chung hian Delhi Dynamos chuan Jerry la thei tur hian transfer fee pawh an pe tawh niin an sawi a ni.

Jamshedpur right winger Jerry hian season hnih chu Men of Steel tan a lo khel tawh a, heng season hnihah te hian Jamshedpur tana player pawimawh berte zinga mi a ni a. 2017-18 season chhung khan Steve Coppell kaihhruaina hnuaiah match 16 khelin, heng game 16-ah te hian a tir atangin a khel vek a ni.

2018-19 season-ah pawh Spanish coach Cesar Ferrando kaihhruaina hnuaiah Mizo tlangval hian game 12 a khel tawh a, hengah hian vawi 6 chu a tir atangin a khel a ni.

Jerry Mawihmingthanga hi Steve Coppell hnuaiah a che tha hle a, manager tawn hriat ngah tawh tak mai Steve pawh hian a fak thei hle a. Steve Coppell hian Jerry chu a tha bawk a, ram tana khel tur pawhin a inpeih tawh niin a sawi hial a ni.

DSK Shivajians player hlui hian Indian Super League-ah Jamshedpur FC tan goal khat chiah a thun a, game 29 khelhah mi goal thun tur vawi 4 chu a siamsak a ni.

Josep Gombau kaihhruaina hnuaiah Jerry hi Delhi Dynamos player pawimawh pawl a nih theih a rinawm a, player la naupang tak tak dang pawh an awm nual tawh a. Jerry hian amah ang bawka la naupang seng sawng tak Nandhakumar Sekar, Lallianzuala Chhangte leh Romeo Fernandes te chu a zawm thei dawn a ni.