Nicolas Pepe chu Premier League defender te chuan an hlau nghal viau niin Arsenal legend Nwankwo Kanu chuan a sawi.

Ivory Coast winger Nicolas Pepe hian nipui transfer window inhawn lai khan Ligue 1 club Lille atangin Arsenal a zawm a, Emirates Stadium hi £72 million ($89 million) zetin a zawm a, Gunners ho transfer record thar a siam a ni.

Kum 24-a upa Pepe hian tun season-a Arsenal tana a khelh tawhah boruak a nei lian nghal viau mai a. Game tinah 3.8 dribbles nei anga chhut niin, Premier League bikah chuan amah anga dribble nasa hi an awm lo a. Anfield-a a khelh hmasak berah Premier League match 50 chhunga Liverpool centre-back Virgil van Dijk bum tlang thei hmasa ber a ni thei bawk.

Pepe hian north London-ah bul a tan tha thawkhat hle a, Arsenal leh Tottenham te 2-2 a an inhnehtawk tum khan Alexandre Lacazette leh Pierre-Emerick Aubameyang te nen a vawi khatna atan a rualin bul an tan hlawm a ni.

Nwankwo Kanu chuan season tir lam chauh la ni mah se, Pepe inkhel a hmuh chinah Ivory Coast star chu a lar chho dawn tih a sawi nghal a ni.

Kanu chuan, “Nicolas Pepe hi player tha zet mai a ni a, a ke a rang em em a, a thiamna hmang hian team dangte chu a thiat darh thei ngei dawnin ka hria a. Goal a thun theih bakah mi goal thun tur siamsak kawngah pawh a tangkai em em bawk a ni,” a ti.

“Premier League hi league dangte lakah chuan a danglam em em mai a, hei vang hian hmun dang atanga rawn kal tan chuan insiamremna hun an neih hi a pawimawh ve thin a. Pepe hi chuan a khel tha chho thei nghal zel dawn niin ka hria a, striker pahnihte chu tha takin a puibawm thei ngei ngei ang,” a ti bawk.

A sawi zelnaah, “Player che rang tak mai, a ke pawh rang em em mai a ni a, ball a thiam bawk si a, hei vang hian lehlam pawl defender tan chuan a hnawk hle a. Ven hneh a harsat em avangin Premier League defender te pawhin Pepe hi an hlau tan der tawh a ni,” a ti.

Arsenal tan Pepe chu che chhe hran lo mah se a finishing chu mi thenkhatin an sawisel nghal a. Season liam taah khan Lille tan goal 23 zet a thun thei a, Gunners tan chuan goal thun theihna hun tha nei ve mah se a la thun thei rih lo thung a ni.

Kum 43-a upa Kanu chuan Arsenal tana a khelh laiin game 197 khelhah goal 44 a thun hman a, 1999 leh 2004 inkarah khan Arsenal tan kum 5 zet chu a lo inkhel ve hman a, Premier League title vawi hnih a lakpui hman a ni.