Conor McGregor chuan kumin December thlaah Frankie Edgar chu insualpui a duh thu sawiin, heta a hlawh chu midang tanpuina atan pek vek a tum thu a sawi.

Irish fighter Conor McGregor hi nikum October thlaa UFC 229 hnuah khan octagon chhungah a inlan leh ta miah lo a. UFC 229 ah Khabib Nurmagomedov nen an insual a, Conor hi a chak ta lo a. Hemi hnua an buai zui avangin thuneitute chuan an pahnih hian an hrem zui a, tunah chuan hremna pawh a zo tawh a, octagon chhunga lut thei dinhmunah a ding leh tawh a ni.

Kum 31-a upa Conor McGregor hian tun hnaiah Khabib hmachhawn leh a duh thu a sawi nasa hle a, hetiang hun hi a thlen theih nan mi pawh a dek kual nasa tawh hle a. A beisei ang hian thil a awm thei mai lo a, hei vang hian Khabib cho chhuah theihna a nih beiseiin kaw dang a hreuh leh tan a ni.

McGregor chuan Twitter lamah UFC president Dana White chu a nawr mek a, kumin chhung ngeia octagon chhunga a luhna tur siamsak turin a ngiat a. Conor hian American fighter kum 38-a upa Frankie Edgar chu a cho chhuak tawh a ni.

Frankie Edgar chuan Conor-a’n kumin December thlaa insualpuia a chona chu a chhang rang hle a, an pahniha insual chu a remtih thu sawiin, a tak ram an thlen theihna tur kawnga pawimawh ber chu Dana White a nih thu a sawi.

“Dana White, a insual turte chu kan inpeih der tawh a, kan insual theihna tur hian hma la vat la. Kan insual huna ka hlawh chu mi tanpuina atan in pe vek dawn ania,” tiin Conor chuan a sawi a ni.

Edgar chungchangah Conor chuan, “Frankie Edgar nena insual ka duh chhan chu Khabib nen inanna an nei nual a. An chet dan te, mi an beih danah te hian kawng tam takah an inang a, hei vang tak hian insualpui ngei hi ka duh tlat a ni,” a ti.

“Amah ka beih duh hrim hrim piah lamah Frankie pawhin min hmachhawn hi a lo chak ve hle a, a tu te hnena Conor nen an inbeih tawh thu sawi a chak ve bawk a ni,” a ti bawk.