18 Nov 2020 09:26

bakteaJr.

Mizo tlangval

​December thlaah Canelo Alvarez vs Callum Smith

Tunlai boxer tha ber zinga mi pahnih Canelo Alvarez leh Callum Smith te chu kuminah an inhmachhawn dawna, rokhawlhna dang a awm a nih loh chuan thla leh December ni 19-ah hian an inhnek dawn.

Alvarez leh Smith te inhnekna tur hmun hi tihchian a la ni lova, mahse BBC chuan USA-ah a nih ngei dawn thu a tarlanga, a hmun tur tak hi puanzar a la ni lo.

British boxer Smith hi WBA super-middleweight world champion a ni meka, Alvarez hi WBA middleweight world champion ni ve bawkin, middleweight title pahnih a kawl mek.

Kum 30 mi Smith hi vawi 27 inhnek tawhah chak loh a la nei lova, kum 2018 khan George Groves-a hnen atangin world title hi lain, hemi hnu hian vawi hnih a title a humhim tawha, hun eng emaw chen ata Alvarez hi a lo hmachhawn chak tawh.

Mexican boxer Alvarez hi mi tam takin tunlai pound-for-pound boxer tha berah an ngaia, kum 2013-a Floyd Mayweather a hneh loh bak chu a la chak fai veka, bout 56 nei tawhin, kum 2016 khan Smith-a unaupa Liam a lo hneh tawh bawk.

Kum 30 mi Alvarez hi kum khat chuang a inhnek tawh lova, Smith-a inhnek hnuhnun ber pawh hi nikum November thla kha niin, Liverpool-ah John Ryder a hneh a ni.