​December ni 14-a lo kir tur Mcgregor?

16th September 2019, 09:09PM

UFC fighter zinga division pahniha a ruala champion thei hmasa ber Conor Mcgregor chuan Twitter lamah a lo kir hun tur a sawi thawi niin mi tam takin an ngai.

Mcgregor hian nikum October thlaa Khabib Nurmagomedov a hneh loh hnuah Octagon chhung a la rap leh lova, kumin March thla khan mixed martial arts a chawlhsan thu a sawi zuai nghe nghe.

MMA chawlhsan angin insawi mahse Irish fighter hi UFC-a insual leh ngei tura beisei a ni reng a, ESPN-in thla hmasaa an kawmnaah pawh The Notorious hian kumin kumtawpa insual a tum thu a sawi thawi tawh bawk.

Kum 31 mi Mcgregor hian vawiin (Thawhtanni) khan Twitter lamah ‘Dublin, December 14th’ tih zawng a tweet a, hei hi UFC-a a lo kir ni tur niin mi tam takin an ngai.

Ireland khawpui Dublin-ah hian kum 2015 hnuah UFC neih a la ni leh lova, Dublin-ah Mcgregor hi a insual a nih chuan Mcgregor-a’n a ram ngeia UFC fight a neih hmasak ber tur a ni dawn.

December ni 14-ah hian UFC thleng thei tur hmun Dublin-a awmte chu an awl leh awl lo BBC Sport chuan a chhui nghala, Aviva Stadium chu Rugby Champions Cup khelh nan book tawh ni mahse Croke Park leh 3Arena-te chu an la awl thu BBC Sport chuan a tarlang.

UFC fighter zingah Mcgregor aia huhang ngah hi an awm lo tih ngam a ni a, tu pawh hmachhawn dawn se sum a tlem ngai hauh lo. Mcgregor hi mi hrang hrangin an cho a, mahse a in fight dawn a nih chuan hmanni lawkah Khabib laka tlawm Dustin Poirier a nih a rinawm viaua, Poirier hian featherweihgt lamah Mcgregor hi a lo hneh lo tawh a ni.

Copyright © inkhel.com 2024. All rights reserved.