British boxing world champion ni lai Anthony Joshua leh Kubrat Pulev te chu inhmachhawn tura tih ni reng mahse, coronavirus avangin an la inhnek thei lova, kumin kumtawpah an inhnek thei ngei dawnin a lang.

AJ vs Pulev hi kumin December thla ni 12 hian neih tura tinzawn a ni a, London-a O2 Arena-a inhnek tura tih an ni a, rokhawlhna a awm loh chuan an inhnek ngei a rinawm.

AJ vs Pulev te hi kumin June thla khan Tottenham Hotspur Stadium-a inhnek tura tih ni mahse, hripui leng avanga sawn hlat a ni a, December ni 12-a an inhnek tur thu hi boxing promoter Eddie Hearn chuan a sawichhuak.

Heavyweight boxing bout dang Tyson Fury vs Deontay Wilder 3 pawh kumin kum tawpa a thlen a rinawma, anni erawh a ni leh a hmun sawi chian la awm lo mahse, AJ leh Pulev te inhneka atanga kar khat hnuah a ni dawn niin talkSPORT chuan a tarlang.

AJ leh Fury te hian tuna heavyweight division-a title awm zawng zawng an kawl meka, kumin kum tawpah hian hnehna an chang ve ve a nih chuan, nakkum 2021 hian undisputed champion zawng turin British boxer pahnihte hi an inhmachhawn ngei a rinawm hle a ni.