December 31-ah Mayweather vs Japanese kickboxer

05th November 2018, 09:11PM

Floyd Mayweather chuan December 31 hian kickboxer Tenshin Nasukawa chu Japan ramah a hmachhawn dawn a, Floyd hian mixed martial arts company chu thuthlung a ziahpui thlap tawh a ni.

Boxing ring chhunga hneh loh la nei lo, a hmaa mi 50 chak tawh lo, kum 41-a upa Floyd Mayweather chu mixed martial arts huanga awm Conor McGregor leh Khabib Nurmagomedov te nen an chotuah deuh reng a. Hetiang karah hian kum 20-a upa Japanese kickboxer hmachhawn tur hian contract a ziak ta daih a ni.

Mayweather hian Japan rama mixed martial arts promotion company RIZIN Fighting Federation chu thuthlung a ziahpui a, Tenshin Nasukawa nen an inhmachhawn hunah hian eng dan nge an hman ber tur tih chu an la sawi chiang rih lo.

“Boxing ni lo deuh, thil danglam tih ve chhin ka chak a, ka thiamna hi US pawn lama pho chhuah ka duh bawk a, he fight hi a danglam dawn khawp mai,” tiin Mayweather chuan a sawi.

“Vawi 50 ka lo inhnek tawhte kha US chhungah vek a ni a, ka thiamna hi US pawn lamah ka la entir miah lo a, khawvel hmun hrang hranga ka thiamna leh theihna te hi pho chhuah theih ka duh a ni,” a ti bawk.

A sawi zelnaah, “December 31 ah chuan ennawm thlir manhla tak entir che u ka duh a, tunah chuan RIZIN nen kan inzawm chauh a, nakinah chuan a aia lian leh huap zau te ka la tinzawn theih ka beisei,” a ti.

Floyd chuan, “Kan inbeih dan tur te, weight class te leh thil pawimawh dangte chu nakinah kan la sawi chiang dawn chauh a, hun rei vak loah chuan a kimchangin kan puang thei turah ka ngai,” a ti a ni.

Tenshin Nasukawa hi RIZIN championship velah a tel thin a, MMA leh kickboxing inelna velah a lo tel tawh thin a. MMA bikah vawi 4 a tel tawh a, a la chak vek a. Kickboxing lamah pawh a duai lo hle a, vawi 27 a khelh tawhah a la chak vek a, heng zinga 21 te hi a knock-out hlawm a ni.

Copyright © inkhel.com 2024. All rights reserved.