06 Nov 2020 03:34

inkhel

December 22 atanga NBA season tan an duh

National Basketball Players Association (NBPA) chuan ngun taka an ngaihtuah hnuah 2020-21 NBA regular season chu December 22 atanga tan turin thutlukna an siam.

NBA player inhlawm khawm pawl hian hian season tan hun tur chungchangah hian vote an thlak a, December 22 atanga tan hi an inlungrualna ber a ni a. Team tin atanga aiawh pakhat zel awmna NBPA chuan vote thlak hi an buaipui a, an thutlukna hi club neitute pawhin an rilrem zawng tak niin an sawi.

“National Basketball Players Association (NBPA) hnuaia Board of Player Representatives chuan a thuphungin December 22, 2020 chu 2020-2021 NBA season tan hun atan lungrual takin an pawm,” tiin thu chhuah an siam a ni.

Season tan hun tur chungchangah thutlukna an siam rual hian thil dang eng eng emaw tih fel ngai neuh neuh a la awm a, hei hi a hranpain an la ngaihtuah ve leh dawn a. NBPA chuan thu chhuah an siamah thil dang ngaihtuah tur an la neih chu awlsam taka an tih fel theih an beisei thu an tar lang.

Eng angin nge player te hlawh an kalpui dawn tih te, league thuneitu lamin eng angin nge COVID-19 test an neih dawn tih te, US ram chhunga hri leng nasa karah engtin nge an inkhelh chhoh ang tih te chu an la ngaihtuah tur zinga langsar zual an ni.

Ruahmanna an siam danah chuan 2020-21 season chhungin game 72 khelh tur a awm dawn a. Krismas hmaa season an tan hian kum thar July thla laihawl vela Tokyo Olympics neih hmain playoff khelh zawh hman an rilruk a ni.

NBA hian kumin chhungin $500 million atanga $1 billion vel chu hloh an inrin thu an sawi a. Hetiang a nih avang hian tun atanga kum hnih chhung vel chu player te pawhin 18% velin an hlawh an tihhniam a ngai dawn niin an sawi bawk.

Player thenkhat chuan October thlaa season tawp chauh a nih laia December thlaa season thar tan leh chu an duh loh thu an sawi chhuak a. Kum thar January thlaa tan theih an duh thu sawiin, August thla vela season hman zawh theih an duh ve thung a ni.