Premier League club Nottingham Forest chu nikum nipui bazarah na takin an lo che tawha, tun thlasik bazar liamtaah pawh khan che na leh viauin, Deadline Day-ah player pathum ngawt an lalut.

Forest hian transfer inkhar hma lawkin veteran goalkeeper, Champions League nomawi vawi thum chawi tawh Keylor Navas chu PSG atangin an lalut a, kum 36 mi loan-in an la a, season tawpa lei zui theihna an nei lo.

Costa Rican keeper bakah hian Forest hian Deadline Day khan Jonjo Shelvey leh Felipe te an lalut bawka, Shelvey hi Newcastle United atangin an la a, Felipe hi Atletico Madrid atangin an lalut thung.

Forest hian an goalkeeper Dean Henderson a inhliam avangin Navas hi tun season chhung atan loan in an la a, a tirah PSG nena an indawrna hi tlawlhin tawp hman zet mah se, Forest hian transfer window inkhar hma lawkin PSG hi inremna an neihpui ta a ni.

Kum 30 mi Shelvey chuan Forest-ah hian kum hnih leh a chanve daih contract a ziaka, English midfielder hian Newcastle-ah tun season daih bak contract a nei tawh lova, season kal mekah Magpies tan Premier League-ah vawi thum bak a inlan lo.

Forest player thar dang Felipe chuan kum 2024 June thla thleng daih contract a ziak bawka, Brazilian centre-back kum 33 mi hian kum 2019 khan FC Porto atangin Atletico Madrid a pan a, kum 2020-21 season khan Atletico hi La Liga-ah a champion pui.

Tun thlasik bazar chhungin Forest hian player paruk an lalut a; Navas, Shelvey leh Felipe te bakah hian Chris Wood chu Newcastle atangin loan-in an la a, Danilo chu Palmeiras atangin an lei a, Gustavo Scarpa chu free transfer in an lalut bawk.

Season kal mekah Forest hian Premier League game 20 an khelh tawh atangin point 21 an hlawhchhuak tawha, 13-naah awm mekin, an squad thawm that nan tun season-ah player 30 dawn an lalut tawh a ni.