English club-te bazar hun chu nizan lam khan a tawp ta a, Arsenal chu Premier League club te zingah Deadline Day-a thawm nei ring ber pawl an ni.

Arsenal hian an defence thuam that an mamawh ziah kan theuha, Deadline Day hma hian defence tih loh chu thuam tha mahse defence ber hi an ngaihtuahawm; mahse Deadline Day-ah Arsenal hian defence lama position pahniha an mamawh tak an lalut ta thung.

Deadline Day-ah Arsenal hian player pahnih lei mahse an winger Alex Iwobi a chhuak ve thunga, Iwobi hian pound maktaduai 40 bawr velin Everton a zawm a ni.

Arsenal hian an captain hlui Laurent Koscielny an chan thut a, centre-back lei an mamawh hle; Chelsea atangin Brazilian defender David Luiz an lalut hlawl. Nipui bazar chhung zawngin Luiz leh Arsenal hi sawizawm an ni lova, Luiz hian Chelsea-ah kum hnih daih contract thar a ziah zawh chauh avangin Chelsea-a awm zel tura ngaih a ni.

Deadline Day hma ni chiahin Luiz hian Arsenal zawm a duh tih thawm a rawn ri thuta, Chelsea manager Frank Lampard  pawhin PSG defender hlui hi midang bul ni lovah training a neih tir nghal bawk. Luiz leh Lampard-a inkarah hian eng nge thleng chiah hriat a la ni lova, mahse an inbakaih deuh ni ngeiin a langa, Luiz hian Chelsea hmelma lian ber zinga mi Arsenal chu a zawm ta thut a ni.

Arsenal chuan kum 32 mi Luiz hi kum hnih daih contract an ziahpuia, a manah pound maktaduai 8 vel sengin, Luiz hian jersey no.23 a ha dawn a, PSG-a a mah lo enkawl tawhtu Unai Emery nen an inhrawn leh dawn.

Arsenal hian Celtic atangin Scottish left-back Kieran Tierney pawh Deadline Day-ah hian an laluta, ani erawh hi chu nipui bazar hun chhung zawngin Arsenal nen sawizawm an ni a tih theih. Arsenal hian an dawr hlawhtling dawn lo emaw tih hnuah kum 22 mi Tierney hi pound maktaduai 25 in an laluta, kum nga daih contract ziahpuiin Scottish player manto ber a ni.