Manchester United-a kum khat chiah contract nei tawh Dea Gea chuan Real Madrid sawmna a hnar phal dawn lo niin a lang. Manchester United chuan Dea Gea thlaktu tur an dap kual mek nia media lamin an tarlan laiin Man Utd goalkeeper ropui Van der Sar chuan tuna United-in an kawl mek Victor Valdes chu engkimah United No. 1 ni tura a tlin tawk thu a sawi chhuak.
"Victor Valdes an nei reng alawm, goalkeeper lamah chuan harsatna a awm ka ring lo Dea Gea chhuak ta pawh nise." tiin Van der Sar chuan a sawi.
Kum 44 mi dutchman hian 2011 khan United atangin Football a chawlhsan a, Athletico Madrid atanga £18.9m lai an lei Dea Gea chuan Van der Sar hi a rawn thlak chho ta a ni. Kumin January thla khan Manchester United chuan free agent Valdes chu United-a training an phalsak a. Valdes hian khup hliam a neih vangin Barcelona chuan contract thar an pe ta lova, mahse a dam chhoh leh hnuah Man Utd chuan contract an lo ziahpui ve leh ta a ni.
2014-15 season liamta khan kum 33 mi Valdes hian United tan vawi hnih a inlan ve a, 2002 khan Van Gaal-a'n Barcelona a enkawl laiin Valdes hi debut match a khelh tir a, kum 12 zet Camp Nou-a a awm chhungin Champions League title pathum leh La Liga title paruk a la hman a ni.
Goalkeeper tha tak hi an tam loh avangin club ten an inchuh na thei hle. Dea Gea pawh hian Real Madrid a pan dawn a nih chuan Man Utd tan channa nasa tak a ni dawn, Van der Sar pawhin United tan chuan channa a nih tur thu sawi chhuakin,
"Manchester United a chhuahsan a nih chuan United tan chuan channa nasa tak a ni dawn. Hetih lai hian United chuan a thlak tu tur tha tak a hmu lehnghal thuai ang tih ka ring tlat a ni.
"Khawvela club lian sawi apiangin top 5-ah Real Madrid leh Man Utd te hi an lang ve ziah, duhthan tur pahnih an ni pahnih a nei hi a ropui hle a ni." tiin a sawi.
Van der Sar chuan Valdes chu Barcelona tana ropui taka lo khel tawh thin a nih thu leh a chet ran thu te, outfield player ang maia hnung lama tangkai, back pass ngam goalkeeper a nih thu a sawi a. A club lo khelh tawhna an ropui avangin tawn hriat tam tak a nei a, chu chu United-in an chhawr ngei a rin thu Van der sar hian a sawi bawk a ni.
Van der Sar hi a hun lai chuan khawvela goalkeeper tha ber zinga chhiar tel a ni thin. Ajax atanga chawr chhuakin, Juventus a pan hnuah England lamah Fulham tan a khel leh a, Fulham atangin Man Utd chuan an la ta a, 2005-2011 chhung khan United tan game 250 chuang a khel hman a ni.
source : bbc