American boxer hlui, tuna boxing leh MMA promoter ni ta Oscar De La Hoya chuan Floyd Mayweather leh Canelo Alvarez-te chu inhnek tir leh a duh thu a sawichhuak.

Mayweather leh Canelo-te hi kum 2013 khan an lo inhnek tawha, Mayweather hi majority decision hmangin an chak. Kum 28 mi Canelo hian kum 42 mi Mayweather chu a chawlh hlen hma in hneh ngei a duh ngei dawn a, mahse he fight hi a thleng dawn em tih a sawi theih loh.

Kum 2015 khan Mayweather hian boxing a chawlhsan thu a puanga, mahse hmi hnu hian MMA fighter lar tak Conor Mcgregor hmachhawn turin a rawn kir a, a chak bawk. Mcgregor a hneh hnu hian Mayweather chuan Japanese kickboxer Tenshin Nasukawa chu exhibition match-ah a hneh leh bawk.

De La Hoya chuan Mayweather leh Canelo-te an inhnek leh a nih chuan sum che vel a tam hle tur thu a sawi a, $1.5 billion vel hial a ni thei niin a sawi. De La Hoya chuan, “A hmasa berah chuan Floyd hi a retire tawha, chuvang chuan fight siam tur a awm lo. Mahse Floyd hian rawn kir leh a duh chuan, amah aia weight division hnih vela hniam hi tum tawh suh se. Floyd hi a rawn kir leh a nih chuan Canelo nen inhnek se, $1.5 billion an hnek chhuak thei ang,” a ti.

Canelo pawhin Mayweather chu tum leh a chak thu sawi ve in, “Ka chak loh kha phuba lakna hun neih chu ka duh teh meuh mai. Mahse chu chu a thleng thei lo a nih pawhin, ka kal zel ang,” a ti.

Tunah hian Canelo hi boxer hlawh hnem ber a ni meka, khawvela pound-for-pound boxer tha ber zinga mi a ni bawk. Kumin May thlaah Canelo hian Daniel Jacobs chu Las Vegas-ah a hmachhawn dawn a, middleweight unification bout a ni ang.