​De Gea-a’n captain nih a inbeisei

23rd July 2019, 05:07AM

Manchester United goalkeeper David De Gea chuan Old Trafford-a cham zel tura contract thar a ziak a nih chuan captain nih a inbeisei ve tawh thu sawiin, player-te zinga tawnhriat ngah ber zinga mi a nih thu a sawi bawk.

De Gea hian season khat dang bak United-ah contract a nei tawh lova, tunah hian United nen contract thar chungchangah inbe mekin, inremna an nei tawh niin Sky Sports chuan a tarlanga, mahse official-a puan erawh a la ni lo.

Sky Sports tarlan danin De Gea hian Old Trafford-a cham zel turin kum ruk daih lai contract thar a ziak dawn a, a hlawh zat tur hin pound 350,000 atanga pound 375,000 inkar vel a nih dawn avangin khawvela goalkeeper hlawh hnem ber a ni dawn.

United hian captain an la nei lova, tun nipui chhungin an captain Antonio Valencia chu an chhuah zalen avangin tunah hian captain thar tur an la ruat lova, Paul Pogba emaw De Gea hi an nih ngei a rinawm chho hle.

Kum 28 mi De Gea chuan, “Game thenkhatah chuan captain ka lo ni ve tawh a, Manchester United ang club tana captain arm-band hren chu thil nuam tak a ni ngei mai. United ang club tana captain nih hi a ropuia chuvang chuan captain nih pawh a chakawm hle.

“Ka season kuana ka hmang chho dawn meka, player-te zinga tawnhriat ngah ber pawl ka ni bawkin ka inhria. Khelmual chhungah hian tawnhriat ngah tak ka ni tih ka lantir a ngai a, player naupang zawkte hi United tana khelh awmzia ka hriat tir an ngai bawk.

“Hma kan sawn em em a, Manchester United kan ni a, trophy la tura kan beih a ngai. United player kan nih chuan eng trophy pawh la thei tura kan beih a ngai a, theihtawp chhuaha a chung bera kan awm leh a ngai a ni,” a ti.

Copyright © inkhel.com 2024. All rights reserved.