Manchester City midfielder Kevin de Bruyne chuan club dang tan a inhawn viau a ngaih tawh thu a sawi a, Saudi Arabia lam sawmna pawh a rilruah a awm niin a sawi.

Tun thla hian Belgium international hian a kum 33-na birthday a lawm dawn, Middle East lam pan chu atan a that a rin thu thlengin a sawi nghe nghe.

Wolfsburg atanga Manchester City a pan hnuin De Bruyne hian English club tan ropui takin a khel a, season 9 chhungin Premier League title 6 hlawhchhuakin, City history-a a vawi khat nan kum 2023 khan Champions League no mawi a hlawhchhuak bawk.

"Ka kum ngaihtuah hi chuan, club dang tan pawh inhawn a hun ve hle tawh niin a lang. 

"Ka career tawp lamah sum tam tham tak a awm theih dan chungchang in sawi thin, heng te hi kei pawhin ka ngaihtuah ve te pawh a ngai ang.

"Kan nu Michele pawh hian ram danga hun hman chu a hnial ka ring lo. Heng chungchang te hi kan chhungkuaa kan ngaihtuah chhoh mek a ni a, tunah hian City-ah kum khat chiah contract ka nei tawh.

"Ka fapa upa ber hi kum 8 mi a ni a, England bak hi a la hre lem lo. Engtia rei nge City tan ka khelh dawn tih hi min zawt thin, a hun a lo thlen hunah chuan kan chingfel mai turah ka ngai a ni," tiin Saudi club te ngaihven mek Kevin de Bruyne chuan a sawi.

Season liamta khan hamstring hliam avangin De Bruyne hi thla 5 dawn lai a inkhel thei lo, zai a ni a, Premier League opening match-a a inlan bak a reh vang vang a, season tawp lamah a lo kir leh.

City attacking midfielder hian game 26 khelin, goal 6 a khung a, assist vawi 18 a rawn nei leh hman tho.

Euro 2024 Belgium squad-ah De Bruyne hi koh a ni a, Group E-ah Slovakia, Romania leh Ukraine te nen an awm ho a ni.