17 Oct 2020 03:36

inkhel

Dawtin min puh ve mai mai a ni: Cristiano

Cristiano Ronaldo chu coronavirus dan bawhchhia nia an puh chungchangah a tawng chhuak a, dawta inpuhna mai mai niin a sawi.

Italian sports minister chuan Zirtawpniah khan Cristiano Ronaldo chu Italy ram chhunga coronavirus chungchanga dan an siam bawhchhiaah a puh a. Vincenzo Spadafora hian Cristiano chu coronavirus vei a ni tih finfiah hnuah an rama a thlawh luh avangin an ram inkaihhruaina dan a bawhchhe ngei tih a sawi a ni.

Kum 35-a upa Cristiano Ronaldo chuan Instagram video hmangin an puhna chungchang hi a sawi chhuak a, “Italy rama pa zahawm tak pakhat chuan inkaihhruaina dan bawhchhiaah min puh a, hei hi dawt chiang tak a ni,” a ti.

“Ka la inkhung hrang reng a, dan zawm tur an siam ang chu ka la zawm tha viau zel a. Ka rilru a fim a, thuneitute tih ang thlap thlapin ka la awm zel chu ania. Keimah chauhin ka awm a, ka chhungte nen kan awmho rih lo a. Kan inhnaih a thiang rih lo a, a lo berah ni 10 chhung vel chu hetianga kan la awm hi a ngai,” a ti bawk.

A sawi zelnaah, “Thawhlehnia ka positive tih an finfiah hnuah khan dan ka zawm nghal char char a. Portugal team ka kalsan nghal vat a, thlawhtheihna ambulance hmangin Turin khawpui thlengin kan thlawk a. Tu mah ka hnaih lo a, ka si lo bawk a, theihtawpin ka fimkhur ve a ni,” a ti.

Spadafora chuan a duhthawh viau a, a hnuah pawh, “Player lar leh thiam chungchuang a nih vangin dan ngaipawimawh lo tur a ni bik lo a, luhlul taka awm hi a tih tur a ni lo hrim hrim a. Chu mai piah lamah dawt sawi te, thu dik lo tan luih tlat te hi a tha lo hle a ni,” tiin a sawi bawk.

Juventus pawhin thu chhuah an siam a, Ronaldo chuan symptom a nei lo a, Italy ramah dan behchhanin a thlawk lut tih an sawi a. Portuguese star hi Serie A lama Crotone nen an inkhelh hunah a tel thei dawn lo a, October 20 a Dynamo Kiev nen UEFA Champions League an khelh hunah pawh a tel thei dawn lo a. Kar khat hnuah Barcelona nen an inkhelhnaa tel tur chuan October 21 ah a negative a ngai dawn a ni.