Tun season tawp rual hian PSG-a Messi-a contract a tawp dawn, World Cup lai vel khan Messi chuan Paris-ah contract thar a ziak dawn nia report a ni a.

World Cup a zo a, kum 2023 pawh March thla chawhnu lam kan chuang kai leh tawh. Messi-a contract thar chungchangah thawm a reh khawp mai.

Media lam erawhin rinthu an tarlang nasa thung. Kar tir lam khan Messi chuan PSG-in contract thar an zawrh a pawm lo niin an report a, a hlawh phut zat PSG hian pek an tum loh vang niin report a awm nawk mai.

Tin, Saudi club Al Hilal pawhin €600million hlawh turin Messi hi an dawr a, Ronaldo kalna lam a pan ve dawn ni tein thu thang a awm nawk hman bawk.

USA lam atangin Inter Miami pawhin an ngaihven ve reng bawk a, Messi-a hma hun chungchangah hian titi a tam hle.

An head coach Christophe Galtier nen an inkar thu a that loh avangin, Messi hian PSG training a zawm lo niin Paris lam chanchinbu te chuan an tarlang ve mek bawk a.

Messi-a pa Jorge Messi a tawngchhuak ve ta hial, "Eng tikah nge dawt hi in sawi tawp dawn?" tiin instagram-ah a post a, hetah hian chanchinbu thenkhatin Messi-a chungchang an sawina thlalak a dah tel bawk.

"In thu chhuah te hi finfiahna in nei em? Thu dik lo vek a ni e. Eng ang pawhin heng ho hi au ring mah se, lo awih tawh suh u. 

"Followers neih hnem tuma hetianga thu dik lo vawrh thin hi kan tuar thei tawh lo tep a ni," tiin Jorge Messi chuan instagram lamah a tarlang tel bawk.

Messi hian tun season chhungin PSG tan game 31 atangin goal 18 a khung tawh a, assist vawi 17 lai a nei tling tawh bawk. 

Champions League last 16 atanga Bayern Munich-in an hnawhchhuah danah, Lionel Messi hi media ten an dem hle.

An coach Christophe Galtier erawhin, Messi chauh a nih loh thu leh, dem tur an zawng dawn a nih chuan team pumpui chu dem tur an nih thu a lo sawi ve tawh a nih kha.

World Cup zawha Paris khawpui a pan leh ve leh, Messi hian PSG-ah contract thar a ziak dawn nia sawi kha a ni a.

Hetih lai hian vawiin thlengin contract thar thawm kan la hre lo, PSG coach chuan contract thar chungchangah inbiakna an kalpui reng thu a sawi a.

Messi hi Barcelona lama kir leh tur ang tein thu a thang a, a kum a lo upa ve tawh a, PSG-a contract thar a ziak leh a nih chuan, Paris club atang hian football a chawlhsan ngei a rinawm tawh dawn a ni.