Kumin Davis Cup khelhah United States an che fuh chho hle a, 2012 hnua a vawi khatna atan semi final an khel thei dawn a ni.

Chawlhni khan USA hian Belgium an hmachhawn a, 4-0 in USA hi an chak a, Belgium nen an inkhel hi a pawimawh bawk a, tha an thlah lo hle a, an chak chiang hle reng a ni.

World No. 54 Ryan Harrison chuan Ruben Bemelmans chu minute 65 chhung chauhin 6-3, 6-4 in a hneh a, US hian Davis Cup bikah Belgium hi 5-0 in an hneh ta a ni.

September 14-16 khian US hian Croatia chu semi final an khelhpui dawn a. An inkhelh kar hi a inhlat thei hle a, hei vang hian inthlahdah hleihtheih a ni lo a ni.

US captain Jim Courier chuan, “Davis Cup bik hi chu a dangdaiin inring renga awm a ngai a. Thla engemaw zat kan khel lo vang vang a, inkhelh leh thut te a ngai a, inthlahdah theih a ni lo,” a ti.

A sawi zelnaah, “Theihtawp kan chhuah ngei a ngai dawn a, kan tumpui tur Croatia hi tawh an khirh hle dawn a, kum hnih kalta khan Croatia nen hian quarter final-ah kan intum tawh a, 2-0 a hma kan hruai laiin min pawtthla a, kan hneh lo zui a. Tun tumah chuan hnehtu zawk nih ve ngei kan tum a ngai,” a ti bawk.

Spain chuan semi final an lut bawk a, France nen an inhmachhawn dawn a. France hian Italy an hneh a, semi final hi an luh theih phah a ni.