David Villa chuan football khelh chawlhsan a tum thu a puang a, tun season tawp thleng chauh a inkhelh tawh dawn thu a sawi.
Barcelona striker hlui kum 37-a upa David Villa hian kuminah Japanese club Vissel Kobe ah a khel a, tun season chhungin league match vawi 3 chiah khelh tur an nei tawh a, December thla tawp lamah Emperor’s Cup semi final an khel dawn bawk a ni.
Nilainiah David Villa chuan a thil tum hi a sawi chhuak a, inkhelh chawlhsan a tum tawh thu hi sawiin, a chawlh dan tur chu ama duh dan ang taka ruahman a duh thu hi a sawi a ni.
“Hemi chungchang hi hun rei tak ka lo ngaihtuah tawh a, ka chhungte leh ka thiante ka be rawn hlawm a, chumi hnuah thutlukna hi ka siam ta a. Football khelh hi chawlhsan ka duh a, chawl tura min nawr hma ngei hian chawlhsan ka tum ta a ni,” tiin David Villa chuan a sawi.
2010 World Cup winner chuan a chawlh hma ngeia trophy pakhat tal lak leh ngei a tum thu sawiin, Emperor’s Cup trophy chu lak ngei a tum hle.
“Ka chawlh hma ngei hian trophy lak leh hman ngei ka duh a, January 1 ah khian Vissel Kobe chu Emperor’s Cup trophy hi lakpui ngei ka tum tlat a. Chumi hnuah chuan inkhelh ka chawlhsan tawh ang a, khelmual pawn lam atangin football chu ka la ngaihven reng dawn thung a ni,” a ti.
Villa hian kum 19 chhung vel zet chu football hi a khel ve tawh a, Spanish club Sporting Gijon atangin bul a tan a, hemi hnuah hian an ram chhunga club hrang hrang a zawm kual a. Real Zaragoza, Valencia, Barcelona leh Atletico Madrid velah te a khel kual hman a ni.
A vanglai hun tam zawk chu an ram chhung club velah a hmang a, 2015 kumah khan Major League Soccer lam a pan a, New York City chu a zawm a. He club-ah hian season 4 chhung zet chu a khel hman a, kuminah Vissel Kobe hi a zawm ve leh a ni.
Tun season chhungin Villa hian game 26 khelhah goal 12 thunin mi goal thun tur vawi 2 a siamsak bawk a, J-League ah Vissel Kobe chu 10-naah an awm mek a ni.
David Villa hian a vanglaiin La Liga title vawi 3 a la a, Copa del Rey chu vawi thum la bawkin, 2011 kumah khan Barcelona chu UEFA Champions League title a lakpui a ni.
Spaniard Villa hian Spain aiawhin vawi 98 chu a khel hman a, Euro 2008 ah a champion pui bakah 2010 FIFA World Cup champion a nihpui thei bawk a ni.
David Villa Honours
REAL ZARAGOZA
Copa del Rey 2003-04
Spanish Super Cup 2004
VALENCIA
Copa del Rey 2007-08
BARCELONA
La Liga 2010-11, 2012-13
Copa del Rey 2011-12
Spanish Super Cup 2010, 2011
Champions League 2010-11
Uefa Super Cup 2011
Club World Cup 2011
ATLETICO MADRID
La Liga 2013-14
SPAIN
European Championship 2008
World Cup 2010