11 Feb 2019 05:39

inkhel

David Ibbotson zawnna atan Mbappe-a’n pawisa a thawh

French football star Kylian Mbappe chuan Emiliano Sala chuanna thlawhtheihna khalhtu David Ibbotson ruang zawn chhunzawmnaa hman turin ama pawisa £27,000 (Rs. 24,79,256.19) a thawh.

January 21 a Nantes atanga Cardiff an pan laia thlawhna chesual pilot David Ibbotson ruang chu hmuh a la ni lo a, Cardiff City in Nantes atanga an lei Emiliano Sala ruang chu hmuh tawh niin, an la chhuak vek tawh thung a. Ibbotson-a chhungte chuan theihtawp chhuahin ruang zawn hna hi thawh chhunzawm zel an tum a, hetiang tur hian pawisa mamawhna a nasa a, mi inpe hrang hrangin an thawh khawm mek a ni.

Guernsey bula thlawhna tlaah hian David Ibbotson ruang hi an la hmu miah lo a, a zawn hna a hautak avangin sum mamawh pawh a tam tham hle a. David-a chhungte chuan internet kal tlangin tanpuina an dil a, £300,000 vel tal an mamawh thu an tarlang a ni.

Khawvel hmun hrang hranga chengte chuan he thil thleng lungchhiatthlak tak mai hi an ngaihven zel a, hetianga pilot ruang hmuh a la ni lo pawh an vei tlang hle a, hei vang hian ruang hmuh a nih ve theih ngeina turin pawisa pawh an thawh khawm mek hlawm a ni.

England captain hlui Gary Lineker pawhin £1,000 chu a thawh tawh a, mi 7,000 vel zet chuan an phal ang tawk pawisa chu an thawh tawh a, sum tling khawm pawh £130,000 zet chu a tling tawh a. World Cup winner leh Paris Saint-Germain forward Kylian Mbappe pawhin £27,000 chu a thawh ve tawh a, mahse ama hming ni loin Elie Lottin tih hmingin a thawh thung.

Gary Lineker chuan a tam thei ang berin pawisa hi thawh se a tih thu sawiin, ama Twitter account lamah pawisa thawhna tur link pawh a tarlang a ni.

Thlawhtheihna tlak hnuah sorkar chuan thlawhna leh ruang zawn hna hi ni thum chhung an thawk a, chumi hnuah an beidawn avangin an chawlhsan a. Mahse, Sala chhungte chuan anmahni sum sengin ruang zawn hna hi an thawh chhunzawm a, mi thahnemngaite chuan pawisa hi an thawh khawm teuh a, £324,000 zet an neih theih avangin ruang zawn chu an chhunzawm thei a, a hnu lawkah Sala ruang chu an hmu zui ta a ni.

David Ibbotson-a chhungte chuan an pa ber ruang chu zawn chhunzawm zel an duh thu hi puangin, mi thahnemngai te chuan pawisa thawh thei hram se an ti a. Pa ber ruang chu hmuh ngei an duh thu sawiin, thlamuang taka a chawlh theih nan thlana zalh ngei an duh thu an sawi a ni.