David Haye chuan a hmaa a lo hneh loh tawh Tony Bellew a hmachhawn leh dawn a, engkim a danglam vek tawh tur thu a sawi.

May 5 khian London khawpuia O2 Arena-ah Haye hian Bellew a hmachhawn dawn a, nikum March 4 khan anni pahnih hi an lo inhnek tawh a, round 11-naah Bellew hi a chak zawkah a tang a. Tun tuma an inhnek leh hunah chuan David Haye hian chak loh chu a tum tawh lo hle.

Kum 37-a upa David Haye chuan, “Bellew hian keimah ang bawkin training a nei tha turah ka ngai a. Nikum March 4 khan a chak chiang a, kuminah erawh chiang tak leh felfai taka chak zawk nih ka tum bur a ni,” a ti.

A sawi zelnaah, “Nikuma kan inhnek zawh khan zawhna a tam phah em em a, tun tumah chuan zawh chawp leh zawh belh ngai lo khawpa chiangin chak ka tum a, miin kan inhnek chanchin hi kum tam tak an sawi zui ngei ka ring,” a ti bawk.

“Duhthusamin Bellew hi a fit ka beisei a, kei chu ka fit tha zek zawk tawh khawp mai a. Kan fit that ve ve chuan theihtawp chhuahin kan inbei thei dawn a, a entute mit a tlai ting a ni mai,” tiin David Haye hian a sawi.

Nikuma an inhnek tumin round 6-naah Haye hi a ke a na tlat mai a, a ke lehlam deuh chauh ring chungin a khel zui zel a, round 11-naah Tony Bellew chuan a hnek nasa viau a, Haye-a corner lam chuan towel an vawm lut ta ringawt a ni.

Hemi chungchang hi sawi lehin Haye chuan, “Ka dinhmun chhiat ber ni leh a chet that ber niah pawh min hnek tlu thei lo ania. Chuvangin, tun tumah chuan a rawn inring viau a nih loh chuan a chan a chau khawp ang,” a ti.

David Haye hian Tony Bellew a hneh a nih chuan heavyweight title inchuhin Anthony Joshua nen an inhnek a rinawm hle.